OpDvegs a pititha ongalo ompe

0
39

Maria Namupala

EENHANA-Omuhikingalo Pendapala Nghihepa a tseyika nawa nedhina ‘OpDvegs’ okwa wayimine ehangano lyaahikingalo aaNamibia, omasiku ga zi ko no shi wike sha yi okwa pititha oalbuma ye yotango tayi ithanwa Humble beginning.Nekandangala lyombandje nguka a yambuka mEenhana nokuna omimvo 21, okwa holola kutya okwa tameke okuhika oongalo mo 2016, ndele molwompumbwe yoshimaliwa ina vula okupititha oalbuma yiihwapo.

OpDvegs okwa yelitha kutya okwa kala ta longo nuudhiginini opo a pitithe oalbuma ye yotango, ye a gandje etumwalaka tali tungu koshigwana. “Ethimbo tandi putuka onda kala ndina ohokwe yokwiimba nonda kala ndina omathaneko opo ndi tote po ongundu nenge ongenga yandje yokwiimba ngame ndi ulike oshipewa noshitalenti shandje,”a ti ngaaka.Okwa ti ondjodhi ye oya tsu unene konima sho a li ayi moonkundathana na meme gwe oshowo yamwe yomookuume ke, mboka ye mu kumike opo a ye komeho noshipewa she shokwiimba, ye ta kala oshilyo shehangano lyaahikingalo moshilongo nokugandja etumwalaka tali pitile moondjimbo.

Okwa ti oomusika dhe odhi na omulyo, nokwa tokola opo oalbuma ye ndjoka eyi luke Humble beginning moka ta ti okwa gandja oongalo tadhi ulike etameko lye, nokwa itaala kutya ayihe oyi na okweenda nawa.

Moalbuma moka otamu adhika oongalo 11, moka a kwathelwa kaahikingalo ooyakwawo ngaashi Mile, Dj Wiclip, Y Cee na yalwe oyendji. Otamu adhika uungalo ngaashi Keep you dignity, give me a chance, humble beginning okutothamo owala wumwe.
Nonande eli omuhikingalo okwi inyolitha koyUnivesiti yaNamibia moka te ki ilongela onkatu melongo, nomumvo gwaziko okwali toopaleke iilongwa ye, opo a vule aye komeho nonkalamwenyo ye.

Okwati elalakano lye okwa hala opo oondjodhi dhe dhitse molwaashoka ota longo shoka ehole nomutima aguhe, ye a kwashilipaleke kutya etumwalaka olya tumwa muuyuni awuhe, noli na omulyo nongushi tali mwenyopaleke omupulakeni.

Okwa pandula aaholi naayambidhidhi ye mboka yali ya holoka ehulilo shiwike lya piti, teya indile ya tsikile okupulakena koongalo dhaahikingalo yomoshilongo, nokudhi simaneka woo. Okwa pula aahikingalo aaNamibia ya longele kumwe yo taya kala noku yambidhidhathana noku paathana omayele taga tungu.Ta ti aagundjuka oyendji moshilongo oye na ehalo lyokuhika nokwiimba oongalo oshowo okuulika iitalenti yawo, ashike molwa ompumbwe neshongo lyoonzo dhoshimaliwa otali ya tula pevi, na yamwe ohaya kala owala taya imbile momutumba.

OpDvegs ta pula aahikingalo aaNamibia ya longele kumwe, yo taya paathana omayele nokupukululathana ya vule okuhumitha komeho ehangano lyokwiimba oongalo moshilongo, ta ti aluhe aantu ohaya pondola mwaashoka taya lalakanene uuna ye na elongelokumwe ewanawa.

LEAVE A REPLY

Please enter your comment!
Please enter your name here