Okushunwa miilonga komalenga gaNdonga ina ku kolekwa

0
241

Nuusita Ashipala

ONGWEDIVA-Amushanga gwElelo lyopamuthigululwakalo lyaNdonga, Nepando Amupanda okwa ti ina uva oohapu ndhoka tadhi ti kutya omalenga ngoka ga tidhilwe miilonga otaga ka shunwa mo ngaashi tashi hokololwa omathimbo ngaka miikundaneki.

Amupanda ngoka a kutha ko iilonga yuuhamushanga welelo lyOndonga sha landula ekuthomiilonga lyaAmushanga nale Joseph Asino, okwa ti, shoka eshi oshooka kutya ezimo lyuuwa oli na oshigongi nomalenga ngoka nelalakano oku dhiminathana po.
“Inatu lombwelwa sha kombinga yepingeno po. Tse otuli natango pomahala getu, nongele opena sha ngiika opo tatu ke shi lombwelwa,” Nepando a ti.

Okwa ti pamwe nooyakwawo oya tulwa miilonga mbyoka kOmukwaniilwa gwOndonga Immanuel Kauluma Elifa, na oye ashike e na oonkondo oku ya kutha miilong mbyoka. “ Tse otatu ka thiga po ashike iilonga mbyoka ngele omukwaniilwa okwe tu nyolele oombapila. Ngame otandi longo natango iilonga mbyoka ndi inekelelwa handi shi ningi oku ziilila muuwa pOnamungundo,” Nepando a ti.
Nepando okwa popi ndhika ta yamukula omapulo kutya oshike tashi ka ningwa no malenga ngoka opo ga pelwe iilonga yaangoka ga kuthilwe muulenga.

Omvogu elelo lyOndonga olya li lye eta ekuyunguto maaNdonga sha landula ekutho miilonga lyomalenga omanene gooJohn Walenga, Joseph Asino, Vilho Kamanya, Peter Shimweetheleni Kauluma.

Omalenga ngoka omanene oga li ga pingenwa po komunangeshefa, Mvula Munyango, ku Meya gwOndangwa Paavo Amwele, Naeman Fillemon Kambala nokomugameni nale gwomukokoli president Nujoma, Nepando Amupanda.
Ooyene yomikunda yalwe mboka nayo kwali ya mangululwa miinakugwanithwa mbika ongaashi Kashona Malulu, Tonata Ngulu na Fillemon Nambili.

Omupopiliko gOmukwaniilwa , Elifas, Naeman Amwala okwa koleke kutya opena oonkundathana megumbo lyuuwa opo ya paathanwe ombili nokutungwa uukumwe pokati komalenga ngoka ga tidhwa miilonga naangoka ga pewa iilonga mbyoka.Okwa ti opena ompito opo omalenga ngoka ga kuthwa miilonga ga shunwe miilonga yago.

“Ndele ashihe shoka otashi uthwa ashike koshizemo shoshigongi pokati kaambaka pamw nezimo lyomukwaniilwa,” Amalwa ngoka eli elenga enene lyoshikandjo Oniimwandi a ti.Okwa ti ezimo lyuuwa olili moonkundathana okuhanganitha aaNdonga noku ya galulila ombili mokati kawo.

LEAVE A REPLY

Please enter your comment!
Please enter your name here