Omolwashike okolela yi li uupyakadhi m uNamibia ngele ohayi vulu okukeelelwa?

0
88

Iilongo mUumbugantu wAfrika, Namibia na ye a kwatelwa mo, oya taalelwa komukithi gwokolela ngoka tagu holola endopo miilonga yeyogopeko lyopashigwana noshowo nkene epangelo inaali longa sha gwana okukaleka po uuyogoki mokati koshigwana.
Okuza petameko lyo 2018, okwa lopotwa iiningwanima yomukithi nguka yi vule po 2,010 nomaso gaantu yeli 22 miilongo ihetatu – Namibia, Angola, Kenya, Malawi, Mozambique, Somalia, Tanzania, na Zambia.

Mo Namibia oshinigwanima shokolela osha holoka nokundhindhilikwa mo 25 Januali nuumvo sho, omunona gomumati gomimvo 10 nomulongwa posikola yo People’s Primary moKatutura kwa fekelwa ngiika a kwatwa koKolela sho a tameke ta yi kondje oonyata dhomeya dhina olwaala lwafa olwishi. Okamati oka lombwele oondohotola kutya oka li omuhaka pamwe nooyakwawo yaali posikola mpoka nokonima oka tameke taka kungu kokena omupanu. “Molwashoka oshiningwanima shimwe shomukithi nguka osho eholoko lyago, osha pumbiwa pu katukwe oonkatu,” omunambelewa mUuministeli wUundjolowele a popi konima yoshiningwanima shoka.

Omumvo gwayi okwa li iiningwanima yokolela yi vule 109,442 mbika oya fala momaso gaantu 1,708 miilongo 12 Muuzilo noMuumbugantu wAfrika (ESAR), pahokololo lyolutu lwIigwana Hangano lu na sha nuunona nenge, UNICEF.

Mo Namibia eholoko lyokolela olye ya lya landula moompadhi dhuuvu wehuli woludhi halu ithanwa hepatitis E, mboka sigo oompaka wa dhipaga aantu yatatu nokukwata aantu ye li 553 momalukanda giipeleki ga Havana, Goreangab Dam, Ombili, Hakahana nOkuryangava. Eholoko lyuuvu wehuli mbuka wo hepatitis E owa kala wi ipyakidhilwa nawo ku Namibia okuza nkene wa lopotelwe muNovemba omumvo gwayi.
Omukaleli po gwEhangano lyUundjolowele mUuyuni (WHO) mo Namibia, Ndohotola Charles Sagoe-Moses okwa ti uuvu mbuka wehuli naamboka wokolela ohawu taandele monkalo ya faathana. “Onkene osha simana okunenepeka oonkatu ndhoka tadhi katukwa ngaashi uuyogoki womuntu kehe paumwene we oshowo uuyogoki momudhingoloko, egandjo lyomeya gena egameno go oga yogoka noku ekelahi oonyata pamukalo guuyogoki opo oshiponga shoka shi kondjithwe,” Sagoe-Moses a ti.

Omugandjimayele miipambele yomeya neyogopalo gwa UNICEF moshitopolwa shUuzilo nUumbugantu wAfrika, Suzanne Coates, okwa lombwele IRIN kutya nando opwa ningwa eyokomeho ewanawa megandjo lyomayakulo gomeya, uundjugo neyogopeke omimvo dha piti, kapena natango oshilongo sha gwanitha po nenge sha adha omalalakano go 2015 goMillennium kombinga yegandjo lyomeya nuundjugo nenge neyogopeko, elalakano ndika otali utha ando opo ku shonopekwe sigo ometata oshigwana shaantu mboka yaana omeya ga yela noge na egameno oshowo yaana uundjugo.

Omatengeneko gongashingeyi ga WHO na UNICEF oga ulike kutya ooperesenda ashike 53 dhaakwashigwana mUumbugantu wAfrika oyo ye na omeya ga yela, omanga ooperesenda 30 odho dhi na uundjugo, dho ooperesenda 20 odho dhi na omahala gokwiiwatelela gopetameko naantu yooperesenda 21 ohaye kiiwatelela miihwa.

“Onkene moshitopolwa omuna aantu yevule konyala oomiliona 148 taya longitha oonzo dhomeya inaadhi opalekwa , aantu oomiiliona 108 oha ye kiiwatelela miihwa puuyelele yo aantu yevule oomilliona 300 yaa hena omahala goku iyogela komake ga wo,” Coates a ti.
“Omikalo okukeelela nokupanga eholoko lyokolela odhi shiwike dho ishewe ohadhi longo na odha kwatha miilongo yilwe okukondolola nokumweneka eholoko lyomukithi ngoka,” osho a gwedha ko.

Okupalamena oshiponga shika okwa pumbwa oonkatu dhethimbo ele dhi na sha nehumokomeho ndhoka tadhi pumbwa epungulo lyethimbo wo ele okukondjitha onkalo ndjoka tayi vulu oku eta po egaluko lyokolela olundji nolundji,” Coates.

Zambia oye oshilongo sha gumwa noonkondo komukithi nguka hagu taandelekwa komeya gwa dhipaga konyala aantu ye vule paantu 74 okuza muKotoba omumvo gwayi. Iiningwanima yomukithi oyindji oya li moLusaka. Opo epangelo li ngambeke omukithi nguka olya indike aalandithi yiikulya momapandaanda yaa tsikile, na olya indike kwaakale iigongi momahala gopashigwana. Etokolo ndika olya etitha omakuyunguto unene okuziilila kaalandithi.

WHO okwa ti omanga iiningwanima ya halakana yomukithi gwokolela hayi holoka omalupita moZambi. Iiningwnima yoomwedhi ntano petameko lyomumvo gwayi oya li ya pitilile oyindji mbyoka hayi holoka konyala omumvo kehe.

Omapangelo na WHO oya gandja ombedhi kewiliko enkundi lyiiyekelwahi oshowo uuyogoki wopaumwene inaawu gwanena mboka hawu fala menyateko lyomeya niikulya momalukanda naashika osho tashi taandeleke omukithi nguka neendelelo.

Eyamukulo lyepangelo olyo oku ithana aakwiita okukwathela okutula miilonga oonkatu ndhoka dha kuthwa okuopaleka omahala gokulandithila oshowo okuthitulula ominino dhiiyekelwahi. Olya tameke wo iikonga yetuntilo lyomuti hagu gandjwa mokana okutuntila aantu omilliona yimwe naashika osha eta opo iiningwanima yomukith nguka yi shune pevi.

Zambia, ongo oshilongo shiiyemo yopokati okuli mokati kiilongo mbyoka ya taalelwa ke indjipalo lyiiningwanima yo Kolela moshitopolwa shokohi yombuga ya Sahara, okuza tuu ku Mozambique ngoka ta kondjitha okuya ku Kenya ngoka a fa ngaa eli nawa pamahupilo.

“Miiwike ine ya piti po yahugunina komumvo 2017, Zambia okwa lopota iiningwanima yili 217 iipe yokolela mwa kwatelwa omaso gaantu 11, Tanzania okwa lopota iiningwanima 216 iipe moka mwakwatelwa aantu yahetatu ya sa, Mozambique iiningwanima iipe 155 , na Kenya iiningwanima iipe 44 ,” pahapu dhomuwiliki gwa UNICEF moshitopolwa kombinga yomeya neyogopeko mUuzilo nomUumbugantu wAfrika, Suzanne Coates, sho a lombwele IRIN.

Ndele sigo oompaka iilongo mbyoka ya ehamekwa unene oyo Somali na Sudana lyokolukadhi mboka ye ehamekwa kiita moka ooperesenda 72 noshowo ooperesenda 16 dhokolela odha holoka miilongo mbika pauhandimwe wayo.

Kokule noshitopolwa sha ESAR oDemocratic Republic ya Congo oya adhikwa ke holoke po edhigu lyokolela okuza nkene ndjoka ondhigu yi ihulile mo moshilongo shoka momumvo 1994 sho aantu aantu 55 000 ya li ya kwatwa kuuvu mbuka omanga aantu 1 190 ya si komukithi ngoka miitopolwa 24 yomiitopolwa 26 yoshilongo shoka pahapu dhoondohotola dhaana oongamba nenge Médecins Sans Frontières.
Zimbabwe na ye ota kondjitha okupungula mominino dhoku kutha po iiyekelwahi oku yanda eholoko lyomukithi nguka omathimbo nomathimbo moshilolongo okuza kuyele pomimvo 1990.

Omukithi nguka ogwa holokele po momimvo 1999 nomo 2002, naangoka gwa li gwa dhipaga aantu oyendji pokati kAugust 2008 na Juli 2009 –ngoka gwa gumine aantu 98,592 nomaso ge li 4,288.

Omukwatakanithi gwa Oxfam Zimbabwe Abigail Tevera okwa ti omakwatathano gankundipala pokati koominista ohaku yonagula omautho okungambeka eholoko lyomukithi nguka.

Aantu konyala yane oya si mo Zimbabwe kuuvu wokolela omanga iiningwanima yi vule 200 yoo typhoid – uuvu wa fa kolela nawo hawu ende momeya.

Portia Manangazira, omuwiliki goEpidemiology noKondolola yomavu muuministeli yuundjolowele ya Zimbabwe okwa ti uuyogoki moshigwana owu li pevi unene no wa nkundipala.

LEAVE A REPLY

Please enter your comment!
Please enter your name here