Oshikoto sha tula omalolelo gokulesha miilonga

0
124

Obrein Simasi

Omuthiya-Omuwiliki gwElongo mOshikoto okwa tula miilonga omalolelo gokulesha taga ithanwa nenge geli kohi yoshipalanyolo Read in Café Project. Opoloyeka ndjika otayi lalakanene okuhumitha komeho onkalo nohokwe yokulesha mokati kaalongwa.
Onkatu ndjika otayi shunitha pevi eitaalo ndyoka lili mokati koshigwana kutya aaNamibia ka ye na omukalo nohokwe yokulesha, oshinima shoka sha fala anuwa mendopo lili pombanda mokati kaalongwa..

Opoloyeka ndjika otayi tameke omwedhi nguka na oya tegelelwa okuthika pehulilo muApilili gomumvo taguya opo ku talike ngele oya longa na oye eta po elunduluko lya sha monkalo yoku pendutha ohokwe yokulesha. Omumvo moka opoloyeka ndjika andola yi na okuhulila ogo 2020. Netsikilo lyayo kombanda yomimvo ndhoka otali uthwa keyokomeho ndyoka lya ningwa okuza nena sigo omuApilili.
Opoloyeka ndjika otayi ningilwa poosikola ndatu mOshikoto, dho ndhika odho Omuthiya Iipundi, Opawa na Hans Daniel Namuhuja Senior Secondary .

Omalolelo okutala ngele oshigwana otashi kumikwa oku kala oshileshi oga tulwa miilonga melongelokumwe noshilongo Hedmark moNorway, mboka oyo taya gandja iikwamambo noshowo iilongitho yilwe. Opoloyeka ndjika oya tamekele omumvo gwayi sho osheendo shaaNorway sha talele po oshitopolwa okukoleka omakwatathano ngoka ga tungilwe po mo 2015, sho kwa li kwa tokolwa kutya mbaka otaya ka kwathela moshimpungu shomahupilo gomoshitopolwa, oongeshefa, ooshona nodho pokati , uunamapya nokuhumitha komeho ongulumambo.

“Opoloyeka The Read Café Project otayi longitha aalongwa yomograde 9 oku ya kumika ya kale haya lesha. Onkene monkalo ndjika opwa pumbwa ekwathathano, moku eta po onkalo nomudhingoloko guli nawa opo okulesha ku kale okuwanawa. Aalongi naalongwa yoongundu dhilwe otaya kala oombangi dhokulesha huka na ishewe oyo taya tala ishewe nkene mbaka taya yi komeho. Oshikwawo aalongwa yalwe opamwe naalongi otaya tala omaihumbato gaaleshi oshowo oombepo dhawo unene ngele tashiya moku lesha. Osho omuwiliki gwelongo Lamek Kafidi a ulike moshipopiwa she sha leshwa pehala lye ku Elizabeth Mwaala ngoka eli omupeviwiliki gwelongo ihaali hulu.

“Elongelokumwe lyaalongi naawiliki yoongulumambo otali ka gwanithwa nawa nuuwanawa wontseyo yopevi muunongo wokulesha otawu ka tulwa momadhiladhilo gaalongwa. Oshilonga shika otashi ka nkondopekwa sho taku kala nokutalelwa shoka sha longwa nenge aalongwa yi ilongo po okuyeleka nopethimbo ndika sho aalongwa haya talelepo oongulumambo oyo ayeke nokaapena mboka haye ya landula okutala kutya oshike mbaka taya ningi moongulumambo nenge oshike mbaka haya ka tala momahala ngoka osho Kafidi a dhenge omuthindo omanga ta popitha etulomiilonga lyoonkatu tadhi kuthwa okukumika aalongwa ya kale haya lesha nokulesha ethimbo olindji. Opoloyeka oya tulilwa miilonga posikola Iipundi mOmuthiya.

Omukuluntusikola gwIipundi, Thomas Uupindi okwa ti omalombwelo gomoklassa, ogo ageke ina ga gwanena aalongwa yopethimbo ndika:Onkene oongulumambo naawiliki yadho mboka ya dheulwa oku uvako nokudhiladhila nokuwilika eandjaganeko lyuuyelele pondje yongulu yosikola oyi li pompito ombwaanawa okukwatha aalongwa mbaka uuna ootundi dha pita mo.

LEAVE A REPLY

Please enter your comment!
Please enter your name here