Rand Merchant Bank a gandja uuthanguthangu kaanona

0
20

Maria Namupala

OMUTHIYA-Rand Merchant Bank oya gandja omagano guuthanguthangu uhetatu oshowo omagala gomakoko kaanona mboka haya ilongo nokudheulwa okuhinga uumbasikela mOmuthiya.

Moonkundathana nomukwateli komeho gOmuthiya BMX Cycling Club, Salom Ndeshimona, okwa ti ohaya dheula aanona okuhinga uuthanguthangu, noya kala yena ompumbwe yoombaskela ya vule okutsikila nomadheulo gawo.
Uuthanguthangu mboka ya pewa kumwe nomagala oya kosha ooN$ 50 000 mOshikoto, omanga ombaanga ndjoka ya longitha ooN$150 000 oshilongo ashihe.

Ndeshimona okwa ti omadheulo ngaka oya tameke oku ga ninga, konima sho momudhingoloko gwOmuthiya, mwa longekidhwa lwotango ethigathano lyaanona lyuuthanguthangu, lya ningwa kuNamibia Cycling Federation (NCF) no Rand & Merchant Bank (RMB).
Okwa ti aanona oyendji oyena ohokwe yokuhinga uuthanguthangu, ashike kaye wete ondjila ndjoka ye na okweenda.
“Oha tu dheula aanona yaamati naakadhona, olundji hatu shi ningi konima yootundi sho aanona ayehe ya zimbuka, nuunene omadheulo ohaga kalako olyomakaya, molwaashoka aanona oyendji ohaya ende iinano iile okuya komanongelo, nOlyomakaya olyo esiku lya manguluka kuyo,” Ndeshimona a gwedha po.

Okwa ti aanona manga yeli petameko oyena oompito odhindji unene ngaashi okutunga omalutu gawo mokukutha ombinga momaudhano ga yooloka.

Ndeshimona okwa ti uudhano ngaashi mboka wokukayila uuthanguthangu owa kala wa talikako hawu dhanwa owala kaatiligane, a ti shika kashi liwe ngaaka..

Otapu adhika aanona yeli 40 nonande ya tamekele naanona 80 ashike yamwe oye ende taya shuna monima omolwa okwaahena omakwatho giilongitho ya gwana. Okwa indile aavali ya shangithe aanona yawo, yo ya longwe okuhinga uumbasikela yaka kuthe ombinga momathigathano gopaigwana.

LEAVE A REPLY

Please enter your comment!
Please enter your name here