Aakwanepangelo naa yeethepo uulingilingi

0
136

Omupresidente Hage Geingob

Ondi inekela omwa fudha po shagwana nOominista adhihe dhoKabinete odha galukila koombelewa dhadho, nomukumo omupe oshowo eitulemo. Omumvo omupe kehe ohagu etelele etegameno neinekelo monakuyiwa yili nawa. Etegameno ndika olyo lina okutu hwameka opo tu longe iinakugwanithwa nomalalakano getu nawa moomwedhi dhokomeho.

Petameko oshili mondjila okushipopya kutya omimvo ndatu ngashingeyi sho aakwashigwana ayehe mboka ye na uuthemba wokuhogolola moNamibia ongo ongundu yuukwapolitika, ya li ya ulike ehalo lyawo momiyalu ominene, okupitila mehogololo lyopaudemokoli, mokuhogolola ndje ongo omupresidente gwoRepublika yaNamibia nongundu yoSWAPO , ongo ongundu tayi pangele. Mokutu hogolola tse, aantu ya Namibia oya gandja uuthemba wawo wokupangela nokuwilika ngaashi sha uthwa kokatokolitho kotango mekotampango lyaNamibia, hoka taka utha kutya oonkondo adhihe otadhi kala miikaha yaantu ya Namibia. Mboka taya longitha uuthemba mbuka wawo okupitila momalutu guudemokoli woshilongo. Onkene tse mehala lyotango otuna okuuva shoka aantu taya ti, oyo tuna okulongela momukalo guli nawa nogu na oshinakugwanithwa kombanda yokukondjela omauwanawa getu yene.

Ondi shishi kutya kashishi oshinakugwanithwa oshishona noshipu okukala wa hogololwa komwaalu omunene gwaantu okukwatela komeho ewiliko lyoRepublika yaNamibia. Omategameno gaantu yetu ogeli pombanda naashika oshi uvitikeko. Oya tegelela tu tsikile okukoleka uukwatya wetu wopaudemokoli nokukaleka po oohedhi dheisimaneko, emanguluko, uuyuki nombili mwakwatelwa okukala monkalo yenyanyu ndjoka yuuthwa kekotampango lyoshilongo.

Onkene eegululo lyotango lyoKabinete inali, kala oshinima shoka tashi ningwa ashike shafa inaa shi simana. Ompito ndjika natu yi longithe okwi idhimbulutha shoka ekotampango tali tu pula tse mboka tuli moshitayi pitithi shepangelo mekwatathano nokulonga puuyelele, ewiliko lili nawa, okuhokolola shoka tatu longo , okuyamukula mboka ya pumbwa uuyelele okuza kutse nokulonga nawa pwaana uulingilingi miilonga yetu.

Onkene otuna okushitalela meityo lyekotampango kutya tse moshigongi shika shotango shoKabinete otatu dhimbuluthwa tu kale moshili shepangelo lyuudemokoli, epangelo lyaantu, kaantu , nomolwaantu, tatu shi ningi pamukalo tagu ti sha kuyo.

Melalakano lyoku etapo omwiityo guli nawa nokuhwameka egandjo lyomayakulo gepangelo geli nawa, okuza tuu nkene ndi ile mombelewa mo 2015, omumvo kehe ogwa li guna otema nenge oshipalanyolo kohi yaashoka tse twa li twa longo. Ngame onda itaala mokulonga pamukalo gomondjila gwalandula epola lyontumba. Ootema ndhika odha hogololwa nuukeka na odha tungilwa nenge odha kwatakanithwa kumwe. Onkene otema yonuumvo yokuhokolola ina yi ipumpukwa, ndele oya kwatathana nootema adhihe ndhoka dhili oshitopolwa shethimbo lyewiliko lyandje.

Opo shi uvikeko nawa momumvo 2015 otwa li twa hogolola oku kundathana noshigwana kombinga yomathaneko niinima mbyoka ye endelela momathaneko, onkene omumvo ngoka otwa li twe gu pe otema Omumvo gwomathaneko.

Otwa kutha wo omatokolo opo tu ete po omashonopeko momiyalu dhiimaliwa mbyoka twali tatu longitha, omalunduluko mokulongitha iimaliwa ngaka oga ehameke oongeshefa unene tuu ndhoka dha li unene dhiikwatelela kookondalaka dhepangelo. Opo tu hwepopeke onkalo yoongeshefa ooshona naandhoka dhopokati otwa tokola opo tu fute uumbapila womafutilo auhe mboka wali inaawu futwa omumvo gwiimaliwa 2016/2017, omafuto nga oga ningilwe pehulilo lyaJuli 2017.

Sho epangelo tali tala omikalo dha yooloka ndhoka wo dha kwatelamo ayege mekoko, sha kankameklwa kelongitho lili nawa lyiiniwe okuyanda iikungulu yopamahupilo, osha pumbiwa opo aanangeshefa yetu ya kale ya mbwalangandjeka oongeshefa dhawo kaadhi kale ashike dhi ikwatelela. Uuna omahupilo geli nawa inatu dhimbwa kutya momaupyakadhi omuna aluhe okuya pevi nokuyapombanda haku ya ko ta ku yi.

Onkene otwa pumbwa okumona kutya omikanka dhomahupilo getu odhili nawa opo tu vule aluhe okupita miikungulu yomahupilo uuna yetu adha. Shasimana mwaashika okukala twa manguluka okupangela iiyemo yetu mokushonopeka elongitho nayi lyoshimaliwa, okuyanda oku ikongela oongunga dhina ondilo okugongela oshimaliwa shagwana shokulanda iipumbiwa yoshilongo okuza pondje, okukala tatu vulu oku idhopa mo momahupilo uuna pwa holoka onkalo ya li inaayi tegelelwa.

Ondi inekela kashishi oshili kutya Oshikondo Shegameno osha landa ofaalama yoodola 45 oomilliona , omanga tashi tumu aakwiita komagumbo. Kandi shiwo ngele osha ningilwe omumvo gwayi nenge. Minista okwa pumbwa , tu popye, oshoka kandi wete ompumbwe ye endelela okushininga, omanga tatu tumine aantu komagumbo.Moonkambadhala dhetu neitulemo lyetu okumona iizemo mbala, inatu dhimbwa kutya eyokomeho olya pumbwa oonkambadhala itaadhi hulu uulethimbo. Onkene otuna einekelo kutya okathimbo owala okashona keli ko omanga inaatu teya uuwanawa womapungulo getu miitopolwa mbyoka ya simana. Mbika oya kwatela mo iimpungulonga ngaashi; Epungulo momutungilo gwewiliko lyetu , mwakwatelwa etalelo miilongayewiliko

Iinyangadhalwa yokuhu-mitha komeho omapungulo, Okukoleka omulandu gwelongitho lyiiniwe. Oku dhika po omahala gelongo nedheulo lyuungomba wongushu, okushonopeka okwaahena iilonga mokati kaagundjuka.

Oonkambadhala dha gwedhwapo okushonopeka oluhepo. Enkondopeko lyoonkambadhal okuhulithapo elongitho lyoonkondo lyu ukithwa maakiinntu naanona.

Okupungula muundjolowele woshigwana, mwakwatelwa oonkatu okushonopeka omaso gaakiintu taya pulumutha noshowo omaso guuhanona, no Ku opaleka iiyalo mbyoka tayi kwatha moku etapo ekoko.

Aanambelewa naakalelipo ayehe aahogololwa, oya tegelelwa okuhokolola, neendelelo koonakuya hogolola kutya oya, ya sigo openi mokutula miilonga omauvaneko. Ngame onda koneke neipulo enene nokutala aaniilonga yepangelo inaa ya hwama okulonga iilonga yawo.
Aaniilonga yepangelo mboka omupya omunene ye wete shafa sha nathangwa okukala miilonga, yeli miilonga mbyoka oyawo sigo aluhe, nenge taya dhiladhila kutya kapena nando ogumwe ta vulu okuya kutha po pomahala ngoka molwashoka yo aaniilonga yepangelo. Yamwe ohaya ti ‘ngame onda kondjele nokusila evi ndika. Ndele nee mbaka oye na omwenyo natango.

Shafaathana naashika aawiliki yaaniilonga ohaya gandja wo omaipopilo sho inaaya katuka oonkatu okugeela oonakupogola molwashoka mbaka anuwa oya mangwa koveta yaaniilonga yepangelo. Ndele oveta ndjika oya tula po omautho ngoka ge na okulandulwa uuna omuniilonga gwepangelo ta hokololithwa. Onkene oveta inayi pewa ombedhi kutya oyo oshiyimbi okukatukila aapogoli miilonga yepangelo onkatu.

Onkalo ndjika yokukala wu na iilonga tayi adhika miikondo ayihe nokwaana elongelokumwe pokati koominista, naapeviminsta, noohamushanga aakuluntu itayi ki idhidhimikilwa we. Onda tegelela oominista ya kale aakomeho noku eta po oonkalo yi li nawa moka aaniilonga taya gwanitha po iinakugwanithwa yawo.

Omakwatathano itaaga longo pokati kOominista naapeviminista noshowo pokati kawo noohamushanga aakuluntu otayi ka nayipika oonkondo dhetu okugandja omayakulo gongushu.Iiningwanima ngaashi yomiti inaadhi mbesitelwa kuyele osho uuhasha itaawu vulu okudhiminwapo. Omambo gosikola inaaga mbesitelwa mbala osho okwaana uuyuki okunene , naashika otashi fala mendopo lyomunona omuNamibia nokumulumbula uuthemba we wopakotampango a kale a pewa elongo.Uumbapila womafutilo mboka wa longwa nawa nowu na okufutwa ndele inawu futwa pethimbo osha fa okuteya omahupilo. Omishangwa dhopambelewa ndhoka dhina okuyamukulwa ndele inadhi yamukulwa itadhi vulu okudhiminwa po. Otuna okundhindhilika kutya okwaalonga nawa huka oko omutenge omudhigu komapepe gaantu , unene tuu sho yo ye na omashogno ogendji ge ya taalela ngaashi oshikukuta, okwaana iilonga , unene tuu mokati kaagundjuka oshowo ondjala nomikithi.

LEAVE A REPLY

Please enter your comment!
Please enter your name here