Aubameyang na Sanchez ya dhana onkandangala momalanditho gaadhani moliha yaIngilisa

0
17

Shipi Elago

ONGWEDIVA-Oosipana dhokatanga kokoompadhi muuyuni awuhe odha li dhi ipyakidhila nokunkondopaleka omitungilo dhadho konima sho olweedhe lwokulanda nokulanditha aadhani lwa li lwa patuluka petameko lya Januali.

Alexis Sanchez na Pierre-Emerick Aubameyang oyo ya li taya dhana onkandangala melanditho ndika na oya li ya kaleke oyendji ya tegelela ngele otaya ka thiga po oosipana dhawo noku ya kookalaba dhilwe na oshinenenima osha li kutya otaya ka landwa po koshimaliwa shithike peni.

Alexis Sanchez ngoka a kala ethimbo ele a hala okuthiga po oKalaba yoArsenal na okwa li a tindi oku shaina okondalaka ye ompe, oyendji oya li ye wete kutya omumati nguka okwa fa tayi kosipana yoManchester City oshoka oya li ye mu kondjitha ethimbo ele.
Ashike ye okwa hogolola oManchester United mepingathano na Henrikh Mkhitaryan ngoka a joina oArsenal okuka thitika ehala ndyoka Alexis a thigi po.

Arsenal okwa li a pula komeho noku ka konkola pomiyelo dhaBorussia Dortmund opo ya pewe okamati Pierre-Emerick Aubameyang hoka ke li omvalele ya Gabon. Aubameyang oku li gumwe gwomaadhani yo komeho haya tilika muuyuni na oha tula mo ookoola dhamatutu.
Okuya ko kamati haka koArsenal osha li wo sha eta oomvula ntano dha Olivier Geroud pehulilo sho omunamimvo 31 a li ena okuthiga po Okalaba yoArsenal nokuya koChelsea ndjoka ya li yi na wo oku gandja po okamati kawo kokomeho Michy Batshuayi koBorussia Dortmund ongoshitopolwa sho ku etha okamati Auba, eye ko Arsenal.

Phillippe Coutinho okwa li a thigi po osipana yoLiverpool FC yaEngland no ku wayimina osipana yoBarcelona FC yaSpain konima sho a li a ndopa okuya pekende lyo ku landakanitha aadhani lya zi ko.

Liverpool nayo oya eta mo omudhani a simana ngoka a tegelelwa opo a ka kuthe po engwangwano ndyoka lya kala maadhani yokonima mosipana ndjika sho a li a landa okamati komimvo 26 Virgil Van Dijk kosipana yoSouthampton.
Theo Walcott naye okwa li e na okuthiga po osipana yoArsenal ndjoka a dhanena uule woomvula 13 noku wayimina osipana yoEverton konima sho a li a kanitha ehala lye mosipana yoArsenal.

Andre` Ayew ngoka e shiwike nedhina Dede Ayew moGhana okwa li a thigi po osipana yoWestham United noku wayimina omumwayina mati Jordan Ayew kosipana yoSwansea City.

Osipana yoTottenham Hotspurs oya li ye etamo okamati Lucas Moura okuza kosipana yoParis Saint Germain hoka ke na omimvo 25 na ohaka dhana mokati kokapale.

West Ham United okwa mona omumati Patrice Evra ngoka a li a thigipo osipana yo Manchester United mo 2016 noku wayimina osipana yoMonaco, Patrice oku na ontseyo ya gwana po yo ku dhana moPremier League onkene ota vulu a ka shendje onkalo moka muna osipana ndjika.

Osipana yoChelsea oya etamo okamati Ross Barkley okuza kosipana yo Everton na Emerson Palmieri okuza kosipana, yo AC Roma.
Osipana ya landitha po aadhani yawo oyendji ya kala ye na omadhina molweedhe nduka lwomalandakanitho ya Januali osipana yoArsenal ndjoka ya etha aadhani yawo aakuluntu ye li ya ne, Olivier Giroud okuya koChelsea, Theo Walcott, Everton, Mathieu Debuchy okuya kosipana yo Saint –Etienne na Alexis Sanchez okuya ko Manchester United.

LEAVE A REPLY

Please enter your comment!
Please enter your name here