Mee Viivii a hulitha

0
5357

Kefas Elago

ONGWEDIVA-Omukiintu ngoka a li a simana unene koFacebook molwiiyolitha mbyoka a kala nokuninga mOshiwambo okwa thigi po uuyuni mbuka oshiwike shayi.

MeeViivii ngoka a pakuvalwa oye Maria Elias nokwa li omvalele yomEembwa megongalo Oluteyi moshitopolwa Omusati, okwa hulitha oshiwike sha zi ko mOshipangelo shepangelo mOshakati, konima yuuwehame wethimbo ele. Okwa li ena oomvula 62.

Iiyolitha yaViivii oya li ya holoka kepandja lyoFacebook pokati komumvo 2013 na oya kala tayi dhana onkandangala omimvo adhihe dha piti na okwa li iilikolele aalanduli oyendji ngaashi naanaa aadhani yiiyolitha aakwawo ya simana muuyuni.
Aalanduli naaholi yiiyolitha ye oya li ya mbombolokele kepandja koFacebook nokugandja omatumwalaka gawo gomahekeleko kaakwanezimo yameme Viivii.

Yamwe oya li ya tula ko nokuli yimwe yomiiyolitha ye iikulu okugandja esimaneko komukiintu ngoka a li onkulungu mokupopya nokumwenyeka aantu.

Kakele ko ku ninga iiyolitha mee Viivi okwa li wo a kumitha aalanduli ye sho a li e shi okwiimba uungalo woPDK na okwa li shili he wu imbi niitya ngaashi ha wu imbwa kooyene.

Kundana okwa li wo a shanga ehokololo lyamee Viivii ethimbo a li momwenyo moka twa li twa holola kutya nando omukiintu nguka okwa li a simana unene moNamibia okwa kala e li moluhe po lwaashi okutumbulwa, na okwa kala ta hupu nuudhigu unene tuu kombinga yolukalwa oshoka okwa kala ha zi mokagumbo koshinyakwi ka dhikwa noothaila.

Okwa li a pewa omagano gaanona yatatu omukadhona naamati yaali moka omukadhona aadhika a tetekela nale.
Mee Viivii okwa li a taambelwa moshipangelo shaKahao moka a li a kala oomwedhi dhontumba onkalo ye sho ya kala yu uka kuuwinayi okwa li a lundululilwa koshipangelo shepangelo shaShakati hoka a manene oondjenda oshiwike shayi.

Nando iiyolitha ye oya li ya kutula aantu oyendji noku mu likolela aalanduli oyendji Viivii oshitalenti she ina shi mu pa nando odola yimwe na okwa li eli moluhepo, moka oyendji ya li ya ti ngele okwa li miilongo yilwe iinankondo, nena ando oshitalenti she shika shoku popya ando oshe mu kutha kohi yoluhepo.

Oyendji koFacebook oya li ya holola kutya nando mee Viivii ke ko we iiyolitha ye otayi tsikile nokudhana onkandangala, omwenyo gwe nagu vululukwe mombili.

LEAVE A REPLY

Please enter your comment!
Please enter your name here