Nelongo a pewa i futile mondholongo

0
202

Maria Namupala

ONDANGWA-Ompangulilo yaMangestalata mOndangwa oya gandja opo Omukwatakanithi gongundu yoSWAPO mOshitopolwa shaShana Samuel Nelongo i ifutile mo mokakuma.

Nelongo gomimvo 53 ota tamanekelwa uufuthi wiimuna sho anuwa a adhika nongombe yongushu yoshimaliwa shoN$ 5 000, mehuliloshiwike lya piti. Okwali a tulilwa miipandeko poCasablanca popepi noshivelo moshitopolwa Oshikoto.

Otaku hokololwa opolisi moshitopolwa shoka ya tula omufekelwa miipandeko omanga adhika a londeka ongombe ndjoka mosheenditho she shiilonga, okwali a patululilwa epeko shoka she etitha a kale mondjedhililo noku holoke mompangu.

Okwa holoka komeho gomupanguli Ilge Rheent, nomweetipo gwiihokolola yepangelo Charly Nabot Iyambo nokwa kalelwapo komukalelipo gwe Natasha Ndilula a kalela po ehangano lya Samuel Legal Practitioner eli kohi yomutseyiveta Sisa Namandje.

Omufekelwa okwa fatululilwa uuthemba we, no ina pulwa a tye ko sha manga, niihokolola ye oyu undulilwa komasiku 9 Apiilili nuumvo, okwa pewa a fute oshimaliwa shobooloha shooN$2 500, nokwa kunkililwa kaaye omakonakono gopolisi moshipala ngoka geli petameko elela.
Ota tamanekelwa oshipotha shuufuthi wiimuna okuza mo 2016 no 2017, nomweetipo gwiihokolola yepangelo okwa ti omakonakono gopolisi ogeli metifa okumona uukwatya wongombe ndjoka osho wo wa mwene gongombe okuza kombelewa yiimuna nomaukwatya woo galwe.

Uuyelele mboka twa mono okuza konzo yishi okwi inekelwa owa thamuna kutya mwene gongombe ndjoka okushiwike, noyili yimwe yomoongombe 30 ndhoka a kanitha pokati komimvo ndhoka, ta ti pethimbo ndika oya shunithwa miikaha ya mwene, nomufekelwa okwali eke yi tala kofaalama ye muuzilo wOndonga.

Nelongo okwa kuthako oshipundi shuukwatakanithi wongundu sho a kuthako ngoka a li nale omukwatakanithi moshitopolwa shaShana Erastus Kapolo, mu Juni omumvo gwa ziko. Okwa kala omukwatakanithi gongundu yoSWAPO moshikandjohogololo Uukwiyu-Uushona.
Omukuluntu gopolisi moshitopolwa sha Oshana Rauha Amwele okwa koleke emangepo lyomukwatakanithi gongundu yoSWAPO, kakele okwa ti ita vulu okuya muule wa sho noshi li miikaha yompangu pethimbo ndika.

LEAVE A REPLY

Please enter your comment!
Please enter your name here