Okulunga-litapula kaku na onhele moNamibia

0
89

Efimbo noule, oshiwana osha kala tashi nyenyeta kombinga yomalundilo okudengela odi peisho unene peendodo dopombada dopapangelo. Paife nee, omupresidende Hage Geingob okwa kufa onghatu nokwa tokola okulwifa omukalo ou woulingilingi. Ngaashi naanaa e shi twa omufindo pefimbo a li ta popifa okabinete; eeminista novanambelewa aveshe ovo va hoololwa noveli meembelewa depangelo, ova tulwa mo noveli ovapiya voshiwana osho shevahoolola va longele epangelo. Nonghee oshiwana osha teelela ovahoololwa ava ve shi yakule nawa, ndele haku vakaavaka nokunyeka ovanhu ovo ve va hoolola. Onghee otashi hafifa eshi omupresidente a popya monhanaisho nokutofa mo omauministeli oo taa finyaafinywa moshinima shokudengela odi peisho. Okwa tofa mo omapopyo taa ningilwa eembelewa ngaashi yomupanguli-ndjai, omauministeli mwa kwatelwa wouhaku, weemina noikwaenghono, nowoilonga noyeendifo. Omuperesidende okwa pula yoo eeminista di nyamukule, poo vali ope na omakonaakono ta a pula komesho momapopyo oo. Presidente a longa nee nawa. Noshiwana paife osha teelela ashike omakonaakono oo opo a ningwe pouyelele opo noshiwana sha yelelwa.

Oshi uditike ko kutya aa omapopyo ashike, omapopyo taa ningilwa eembelewa depangelo novanambelewa koohandimwe ovo hava longo meembelelwa omo. Nomapyo oo okwa pumbwa ashike ku monike kutya ooshili ile omalundilo ongaho.

Ashike manga ngoo ina pa monika oumbangi omapopyo oo otaa kala ashike omalundilo ongaho. Kakele kwaasho, omapopyo oo kae na efiku naa ka dje po omanga omakonaakono inaa ningwa, noshiwana tashi vilikilwa nokulombwelwa oshidjemo shomakonaakono.
Nongeenge kwa monika kutya ope na shili oo e na mo onyala momapopyo oo, omunhu oo na fikamwe. Omunhu ile ovanhu ovo ova pumbwa okuhandukilwa meyukililo, tashi ningwa okutulwa momhangu yopashiwana ngaashi hashi ningilwa oipofa aishe youlingilingi. Ngee oinima oyo ya ningwa opo ashike oshiwana tashi kale shi na elineekelo mepangelo. Hano nepangelo otali ka kala la hala okuulikila oshiwana shili kutya okulungalitapula inaku tambulwa ko moshilongo omu.

LEAVE A REPLY

Please enter your comment!
Please enter your name here