Oliha yobasketball yoosikola ya tameke mOshana

0
34

Shipi Elago

ONGWEDIVA-Oosikola dhomomudhingoloko gwaNgwediva naShakati odha li dhi ipyakidhila Olyomakaya ga ziko sho oliha yobasketball yooPrima noosekundosikola ndjoka ya kala ta yi popiwa ya li ya nukile mondambo.

Muudhano wooPrima, Erundu olya li lya pewa nambwa koControl Primary school sho lya li lya kanitha uudhano walyo nookoola 12 -14, muudhano mboka wa li wa thigi oyendji ye li othika oshoka aagundjuka mbaka oya li taya dhana yafa ombepo.
Omupya omunene uudhano woosikola dhopevi owa li wa yi wa moshipala komvula ndjoka ya li tayi tilehi omeya ongula yetihamano lya ziko na oya li yewu thikameke konyala oowili dhontumba naasho ya ka sheka ethimbo ndyoka lya li lya uthilwa uudhano wooPrima olya li lya pwako.

Onkene oya li ashike yena okutameka nuudhano woosekundosikola wo wooPrima tawu undulilwa mehuliloshiwike ndika.
Osekundosikola yaShakati oya li ya yi mondambo nomushiinda Iipumbu mpoka pwa li puna iiti tayi teka nuudhano mbuka owo wali wumwe uunene wesiku, oshoka aadhani mbaka oya li taya kondjo opo ya sindane.

Oshakati oshe shi pondola okudhenga Iipumbu nookoola 28 mo 21 nonando oosipana ndhika odha li dhu ulike oonkondo dhi thike pamwe osekundo yaShakati oya sindana molwashoka oyi na uumati we endelela okuumbila mo etanga.

Muudhano uutiyali wesiku Mweshipandeka okwa li a ulike kutya natango oye omukwaniilwa guudhano woBasketball moNooli sho ali a dhenge Evululuko Secondary School 26 mo 16 omanga Ekwafo Secondary School lya li lya kula onkoshi omayego konima sho lya li lya dhenge Gabriel Taapopi 14 mu 12 noku ninga ondjokonona yoku dhenga GT oshikando shotango mondjokonona yoosikola ndhika mbali.
Oliha ndjika otayi tsikile ehuliloshiwike ndika noosikola dhilwe odha tegelelwa dhi ka wayimine oonkwawo ndhoka dha tameka nale .
Ethigathano ndika oli na oosipana hetatu dhooSekundosikola noosipana hetatu dhooPrima ndhoka ta dhi kala tadhi dhana moliha ndjika momukokomoko gwomvula ndjika.

Osipana ndjoka tayi ka wayuka mo yi na iitsa oyindji oyo tayi ka sindana po oliha ndjika yi li kohi yOshana Basketball school ndjoka ya yama kendiki lyoBasketball lyokoKatutura Youth Center ndyoka li li momake gehangano lyaGIZ ndyoka tali lundulula oonkalamwenyo dhuunona omathele moshilandopangelo.

Ehuliloshiwike ndika ooPrimasikola ngaashi Ongwediva Control, Hashiyana Primary School, Liberty Heritage Private School, Kleine Kuppe Private School, Oshakati West Primary School nErundu Primary otaya kaya mondambo poValombola.
Pondo Nailenge omunashipundi gwehangano lyo Basketball moNooli okwa ti opo uudhano mbuka wu kale wu shiwike miitopolwa yokoNooli oya li ya ningi oonkambadhala opo yewu thikithe koshigwana.

“Otwa li twa toto po oliha yoosipana oonene moNooli ndjoka ya tseyika nawa Oshana Basketball League, kakele koliha ndjoka otwa li wo twa totopo ooliha mbali dhoosikola , na otuna opolohalama yokulonga oBasketball moosikola pethimbo lyootundi dhomadhewo,” Nailenge a ti.

Louisa Plaisir, omwiiyambi a za koNdowishi okwa holola nkene uunona wa nyanyukilwa uudhano mbuka na owuna ehalo okuhumitha komeho ontseyo yawo mu wo.
Ta indile aavali opo ya kuthe ombinga mokuyambidhidha uunona wawo uuna tawu kutha ombinga momaudhano oshoka ohashi wu pe omukumo gu li pombanda.

LEAVE A REPLY

Please enter your comment!
Please enter your name here