Omusati, Oshikoto taya ilongekidhile ekopi lyoThe Namibian

0
39

Shipi Elago

ONGWEDIVA-Ekopi lyoshifo sho The Namibian olyo limwe lyomomakopi ga tseyika nawa moshilongo na ohali kala lya tegelelwa koyendji miitopolwa 14 yoshilongo pethimbo lyoPaasa.

Kundana okwa li a talele po iitopolwa ine yokoNooli noku tala nkene ta yi ilongekidhile uudhano wonuumvo.
Otwa li twa taalele po Oshikoto moka twa li twa popi na Johannes Andreas ngoka e tu yakele ko kutya Oshikoto oshi ipyakidhila noku ninga omalolelo opo ku talike uumati mboka tawu ka kalela po oshitopolwa shoka kuudhano wekopi ndika nuumvo.Uudhano mbuka otawu ka kala koshitopolwa sha Zambezi.

“Oshikoto otashi ilongekidha neitulomo notwe shi adha , ehuliloshiwike lya ziko mOsekundosikola yaNehale moka sha li tashi omalolelo gaamati. “Ehuliloshiwike ndika otwa thinda kOshomeya hoka tatu ka kala pokapale ka Oscar Norich stadium moka twa tegelela aamati ayehe ye li kohi yomimvo 20 mboka ya valwa molyotango lyaJanuali 1999 opo ya ka kuthe ombinga,”Johannes a ti.
Okwa ti oku za moTsumeb oya thinda kOsekudosikola yUukule hoka ta ya ka ninga omalolelo mo 23 ya Febluali.

“Omalolelo gahugunina ota ga ka ningilwa modoolopa yaMuthiya moka aadhani ayehe mboka ya li ya kwatwa koshihogololitho taya ka tulwa pamwe opo mpoka tatu ka ninga ehogololo lya hugunina moka tatu ka totha mo aamati mboka taya ka foloma po osipana yoshitopolwa shaShikoto,”Johannes ta holola.

Osipana yoNetball wo nayo oyili wo tayi ilongekidha na otaya ka kala pOsekudosikola yaNehale mpoka taya ka ninga wo omalolelo, nayo otayi dhingoloka noshitopolwa shaShikoto ashihe opo ya tale ngele otaya totha mo aadhani dhingi mboka taya ka foloma po osipana yoNetball.

Oosipana dhOshikoto odha tegelelwa dhi ka kale dha ya montanda mo 19 sigo 29 ga Maalitsa omanga inaya ka ya mela lyondjila koZambezi.

Oshitopolwa sha Hangwena natango ina shi pyakudhukwa na osha gongalele metine lyaziko okuninga oompangela dha nkene yena oku unganeka aamati naakadhona mboka taya ka kalela po oshitopolwa shaHangwena nuumvo.

Uuyelele mbuka otwa li twe wu pewa komuwiliki gwomaudhano mOhangwena Sammy Mushelenga.
Moshitopolwa shaShana otwa li twa popi na Sam Nekwaya omunambelewa gwo NFA ngoka a li a holola kutya inaya tameka natango nomalongekidho onkene ka li wo ena esiku lyothaathaa kutya otaya ka tameka nomalolelo uunake, na inaya totha mo kutya olye ta ka dheula osipana ndjika.

Ina tu vula oku mona uuyelele kombinga yosipana yoNetball mOshana.
Oshitopolwa shaMusati osha mana oku ninga omalolelo na ota shi dhana omaudhano gopambili nOosekudosikola dhomoshitopolwa opo ya tale nkene ta ya dheula aamati mbaka noku ya monena omahala gawo.
Omudhe

uli gwosipana ndjika Shipena Nakalondo okwa ti nuumvo Omusati ogwa hala okukagalula ekopi ndyoka ya li ya sindana mo 2015 sho ekopi ndika lya li lya dhanenwa moshitopolwa shaKunene mOutjo.

Osipana yoNetball yoshitopolwa sha Musati oya manitha omalongekidho gayo opo yi ka tale ngele genongo ota ga fe gongombe sho uudhano wo tango woNetball ta wu ka kutha ombinga lwotango methigathano ndika ta li dhanwa oshikando oshi ti 17.

LEAVE A REPLY

Please enter your comment!
Please enter your name here