Oonkundathana kehumokomeho lyOndangwa

0
101

Maria Namupala

ONDANGWA-Elelo lyondoolopa yOndangwa olya tsakanene naanangeshefa oshowo iikondo ya yooloka yepangelo mbyoka tayi adhika mondoolopa ndjoka nokukundathana iinima oyindji y pamba eyokomeho moshilando shoka.

Omunambelewa omukuluntu melelo lyondoolopa Ismael Namgongo okwa ti oshiithanene shoka osha ningwa owina manga petameko lyomvula, opo ya pulakene noku uva omadhiladhilo nomathaneko okuza kaanangeshefa nomalalakano ga nkene ya thaneka okuyambula po nokuhumitha komeho ondoolopa.

Namgongo okwa yelitha kutya limwe lyomomalalakano gawo okumona ondoolopa tayi humu nawa komeho paliko, pashimaliwa oshowo pauyogoki nopanakalathano. Okwa ti oya hala okumona ondoolopa tayi yi nawa komeho, naashika otashi ningwa ashike nuupu uuna ya tseya omathaneko nomadhiladhilo omawanawa okuza kaanangeshefa mboka taya ngeshefa mondoolopa yawo.

“Omathaneko getu okukala yimwe yomoondoolopa moshilongo, yi na omutungilo goongeshefa gwiikankamekelwa komilandu dhomahumitho komeho, noku mona Ondangwa oyo yimwe yomoondoolopa tadhi humu komeho shi iwetikile moshilongo ashihe. Naashika otatu shi pondola owala uuna tu na elongelo kumwe naakalimo moka mwa kwatelwa aanangeshefa yetu,” Namgongo ta ti.

Okwa ti otaya si oshimpwiyu kutya omwa tungwa oopate dha andjuka nodhili pamulandu, ngaashi a tothamo omathaneko opo oopate mbali dhi kale dha tungwa pamuthika gopashinanena unene ndjoka ye enda konima yoShoprite mOluno, okukwashilipaleka kutya opwa tungwa omalambo gomeya gohanya, ehala lyomaendo lya gamenwa, oshowo omapandaanda ga kale taga imonikila nawa ku kehe.

Mayola gondoolopa ndjoka Paavo Amwele okwa ti elelo otali lalakano opo omayakulo agehe ga kale ge li nawa, naashika otaye shi adha uuna pena elongelo kumwe naakwashigwana osho wo aanangeshefa mboka ye na oongeshefa mondoolopa ndjoka.
Okwa indile pukale elongelo kumwe maakwashigwana yo taya kambadhala okukaleka ondoolopa ya yela, tayi vulu okunana noku hila aatalelipo yaza koombinga noombinga.

Yamwe yomaanangeshefa oya holola kutya ondoolopa yaNdangwa otayi nyengwa okukoka nonande elelo tali longo nuudhiginini. Oyendji oye wete omahumokomeho gu ukithwa owala koondoolopa dhopuushiinda ngaashi Ongwediva nOshakati.
Oya pula ando mu tungwe omahala gomainyanyudho ngaashi uupale womaudhano moka aakalimo yomondoolopa taya kala taya tsakanene nokukutha ombinga momaudhano ga yooloka, yo taya ikaleke kokule nomahala gomanwino.

LEAVE A REPLY

Please enter your comment!
Please enter your name here