Taya kalekepo uukolele womalutu gawo

0
122

Maria Namupala

OLUNO-Aakalimo yomomudhingoloko gOndangwa oyendji otaya kondjitha okukaleka po uukolele nuundjolowele womalutu gawo, sho haya gongala oowili dhokonima yiilonga haye shi ningile pokapale komaudhano kosekundeskola ya Andimba mOluno.
Omukwateli komeho gongundu ndjika nomutotipo gwayo Tangeni Abraham a tseyika nawa Biggy okwa ti oya tokola okutota po ongundu ndjika tayi ithanwa Team 07 Fitness Academy & Bootcamp, okuhumitha komeho uundjolowele. Oakademie ndjika oye yi toto po nakuume ke Uyepa Mathias.

Oya tamekele niilyo iishona nonande omwaalu tagu ende tagu koko. Okwa ti omalakano gawo oya hala aantu ayehe ya kale yena omalutu ga kola no ga ndjanga nawa taga vulu okwi inyenga nokukala gena oonkondo.

“Otwa koneke aantu oyendji konima yiilonga haya kala pomahala gomanwino, no twali twa thaaneke tu ete po ongundu ndjika yokutunga omalutu getu pamwe nokukundathana nkene tuna okukala tuna omalutu ga kola noga ndjanga”, Biggy a ti.

Okwa gwedha po kutya shika otashi hanganitha aantu yomapipi ga yooloka molwaashoka kayena ondjoolola, ohaya taamba aantu yoomvula adhihe, naashoka taya lalakanene shimwe shike, unene okukondjitha eyondo momalutu unene molwashoka aantu yamwe oya konekwa yena omalutu omanene unene no ihaya vuluwe okwiinyenga nawa.

Biggy ta gwedha po kutya otaya tungu omalutu gawo, nokwa holola kutya oye na iilyo tayi ihilile pe100, noyendji oyu ulike eitulemo lyawo, nohaya gongala aluhe pokapale mpoka. Mboka ihaa ya mono ompito okuholoka mokati koshiwike ohaya holoka woo ongula onene yOlyomakaya.

“Omaudhano kehe oga simana unene maagundjuka nomatsakaneno ngaka ohaga gandja ompito ombwaanawa kaakuthimbinga ya topolelathane uunongo mboka ye na, yo ya hangane nooyakwawo yo ya tseye nkene omilandu dhokutunga omalutu nomaudhano galwe haga longekidhwa,” Biggy a gwedha po.

Okwa ti aantu oyendji oya tala owala ombinga komaudhano ngaashi etanga lyokoompadhi, lyomokambamba nomaudhano galwe, ashike iinyangadhalwa ngaashi yokutunga omalutu nayo oya simana na oyo ombinga yimwe yomaudhano, tayi koleke omalutu go ga kale taga vulu okulonga oshilonga kehe.

Biggy ta indile ayehe mboka ye na ehalo ye ya wayimine ye shi ninge, yo ya kale taya gongala pokapale esiku kehe noku tsikila okutunga omalutu gawo.

Ta ti otashi kwathele omalutu ga kale ga ndjanga ethimbo kehe , yo ya yande omauvu ngoka haga holoka ngele omuntu iho pe olutu lwoye omadhewo ga gwana, nokwa ti ohashi kaleke wo uuvu nomaunkundi kokule, nolutu ohalu vulu okukondjitha omikithi kehe.

LEAVE A REPLY

Please enter your comment!
Please enter your name here