Yatatu ya gwile momeya ehuliloshiwike

0
304

Maria Namupala

ONAYENA-Opolisi oya lopota aantu yatatu ya hulitha mehulilo shiwike lya piti, konima sho ya gwile momeya komahala nokiitopolwa ya yooloka moshilongo. Uuyelele mboka wa pitithwa komupopiliko gopolisi moshilongo Kauna Shikwambi owa koleke shika.
Olopota yotango okwa tseyithwa omulumentu gomimvo 50 a hulitha sho a gwile momeya komukunda Okantonge mOnayena moshitopolwa Oshikoto Olyomakaya. Nakusa okwa tongololwa oye Veikolina Frans Tutaleni.

Otaku hokololwa a zi megumbo tayi kuundunda womanwino wuli popepi negumbo lye oowili dhongulonene esiku ndyoka, ashike okwa konekwa inaa galukila kegumbo. Olutu lwe, olwe ki itsuwa mondombe yomeya kokatekulu ke, aapambele ye oya tseyithilwa nomakonakono gopolisi otaga tsikile.

Natango opolisi moshitopolwa sha Omusati oya lopota okanona kokamati ka hulitha sho ka gwile metale lyomeya kOnaame etitano. Otaku hokololwa nakusa Alweendo Martinus Kamakela aadhika ta kambadhala oku kwata oohi pethimbo lyoshiningwanima.
Olopota yopolisi moshitopolwa ya pitithwa omaandaha oyati oshiningwanima osha ningwa potundi onti18h00, ontega nosikola yOndeka Combined School, naapambele ye oya tseyithilwa nale.

Oshiningwanima oshikwawo osha lopotwa koWindhoek, sho okamati komimvo 12 ka hulitha sho ka nukile momulonga gomeya sho ka adhika taka kambadhala okumbwinda, nakusa Innocent Prince Shishiiveni Shimbundje okwa li pamwe naalongwa ooyakwawo yatano (5) pethimbo oshiningwanima sha holoka, nohaya hiti osikola yongula poMandume.

Shikwambi ta ti aapambele oya tseyithilwa nokwa kunkilile aavali ya kumagidhe aanona kaaya dhane omeya molwaashoka oga nika oshiponga noonkondo.Okwa ti aakulupe naya yande okuya kuundunda womanwino ethimbo lyokwatoka, unene pethimbo ndika lyomvula.
Moshiningwanima sha yooloka olutu lwomukiintu omugundjuka Omaandaha olwa fulwamo kopolisi poRundu, konima sho nakusa a mangwa komuholike gwe okusa ete mu fumvike mehuliloshiwike.

Uuyelele mboka wa pitithwa komukonakoni nomukwatakanithi koshikondo shiimbuluma moshitopolwa sha Kavango Bonifatius Kanyetu, owa ti nakusa okwali omulongi posikola ya Martin Ndumba Combined School mo Divundu.

Kanyetu ta ti yina yanakusa okwali a lopota omwana a kana kopolisi, shono kuume ke aka tulwa miipandeko lwanima nokwa kala ta pulwa ngele okushi kuume ke mpoka a yi, omufekelwa okwa ka popya yemwene kutya okwa dhipaga nakusa, nongula yOmaandaha okwa fala opolisi mpoka emu fumvika, nolutu lwe olwa fumvulwamo.

Otaku hokololwa pokati kokuume mbaka pwa kala okwaa uvathana, moka Kanyetu ta ti uuna iipotha nomahepekathano ngaka taga monika naga lopotwe mbala kopolisi yo oonakuninga iihakanwa ya gamenwe, yo mboka taya ningile yakwawo omahepeko ya tulwe miipandeko noku ungaungwa nayo.

Edhina lya nakusa itali vulu okutumbulwa molwaashoka aapambele ye inaya tseyithilwa natango, nomakonakono gopolisi otaga tsikile. Omufekelwa okwa tegelelwa a holoke mompangu ya mangestrata gwa Rundu oshiwike shika.

LEAVE A REPLY

Please enter your comment!
Please enter your name here