Ama Daz Floor oku uka komeho moongalo

0
75

Pinehas Nakaziko

WINDHOEK-Ongundu yaa imbi yane yedhina Ama Daz Floor, onkene tayi pula komeho, noku shi enditha nawa ngele tashi ya muuhikingalo.
Ongundu ndjika otayi humu nawa komitse sho omasiku ngaka ya pititha oalbuma yawo ontine yedhina Comrades, ndjoka yi na omaimbilo omilongo mbali, ngoka ge na omikwelengendjo tadhi kwelengendja noku inyenga nawa.

Moalbuma ndjika omuna omaimbilo ngoka omawaanawa mwakwatelwa Okanyakwi, Africa naChoma. Africa naChoma oongalo ndhoka dhali dha piti tango pehulilo lyomwedhi gwayi, no dha kala noku inyenga nawa kooradio dhomoshilongo.

Ongalo Africa, ndjoka ya ningilwa omikwelengendjo kuMomento, aaimbi mbaka otaya popi nkene ye li mondjila yawo okufala oongalo dhawo pondje yoshilongo, unene tuu menenevi Africa.

Africa ongalo ndjoka yoSoukous Kwasa, itaayi vulu okuthiga omuntu omutumba no yi na etumwalaka kaahikingalo unene tuu mboka aashona opo ya wape okufala iitalenti yawo pondje yoshilongo.

Ongalo onkwawo oondjoka yedhina Choma, moka aaimbi mbaka ya ti oya hala kutya oto tyukwa kumukweni, nokonyala oyili kombinga yethigathano lyokundaanisa oongalo dhoKwasa.

Zulu Boy ngoka eli omupopiliko gwongundu ndjika okwa ti yo otaya longo nuudhiginini noya manamo, okutota noku imba oongalo ndhoka tadhi tungu, notadhi nyanyudha aapulakeni oyendji.

Nuumvo oya tokola okukanyanyudha piituthi ya yoolokathana, meni nopondje yoshilongo, no taya ka pititha uuvidio woongalo dhawo ndhoka dha dhenga mbanda.

LEAVE A REPLY

Please enter your comment!
Please enter your name here