G.T ota tjakaleke noNetball mOshana

0
31

KuShipi Elago

OSHAKATI-Osipana yaakadhona yoshitopolwa shaShana kohi yomimvo 20 ndjoka ya tulilwe miilonga Olyomakaya ga zi ko oya kalelwa po komwaalu omunene gwaakadhona ya za moseko yaG.T, nomwaalu omushona ogo ashike gwa za moosikola dhilwe moshitopolwa shoka.
Ongundu yaakadhona yo kohi yomimvo 20 oya li pokapale koNetball mOshakati opo ya tale ngele otaya nana omeho gaanambelewa mboka ya li ye na oshinakugwanithwa shoku hogolola osipana yoshitopolwa ndjoka tayi ka kutha ombinga momathigathano giitopolwa.

Osipana ndjika oya tegelelwa yi ka tameke noshinakugwanithwa sha yo shotango koKatima Mulilo, hoka tayi ka wayimina iitopolwa iikwawo mekopi lyoshifo shoThe Namibian, ndyoka lya hiya iitopolwa ayihe 14 opo yi etelele oosipana dhoNetball.
Yaheyali yomaadhani omulongonayaali mboka ya hogololwa opo ya dhike po osipana yotango yoshitopolwa shaShana oya za mosekudosikola Mweshipandeka, Iipumbu nEheke.

Omunashipundi gwoNetball mOshana James Andima okwa holola kutya osipana ndjika, ka yi shi owala yoku dhana muudhano wekopi lyoThe Namibian ashike otaya ka longitha uudhano wekopi ndika oku tala ngele osipana oyi li pomuthika omwaanawa, oshoka oya tala neho limwe kuudhano wopashigwana wiitopolwa mboka tawu ka kala ko muMai moVenduka.

Andima okwa ti aakadhona mboka ya tothwa mo oya li ya ulike uunyakwa wawo momaudhano ngoka ga li ga hiya ongundu yaakadhona ya konda po 40 mboka yu uhala koshidhinditho Olyomakaya ga zi ko.
Oku uvite kutya oya tunga po osipana ya kola na itaya ka kutha owala ombinga ndele otaya ka kondjitha nokukambadhala opo ya sindane po ekopi ndika lwotango.

Osipana ndjika otayi ka thindikilwa kosheendo sha pama sha thikama momudheuli gwosipana,omupehadheuli, omunashipundi gwoNetball moshitopolwa, omukuluntuwiliki gwosipana), omuhikihiya, na amushangandjayi.

Olutu lwomaudhano ndoka opo lwa totwa mOshana olwa tegelelwa opo lu ka kale omutumba lu pongokonone nokutala nkene oosipana dhomOshana tadhi ka enda okuya momathigathano ngaka.

Mpaka ota pu landula omadhina gaadhani: Rachel Erastus (GS) Gabriel Taapopi,Josephine Shilongo (GA) Gabriel Taapopi, Julia Kalimbo(WA) Gabriel Taapopi,Liina Weyulu (C ) Iipumbu SS, Lily Kashihalwa (GK) Gabriel Taapopi,Maija Amadhila (GD) Gabriel Taapopi, Maria Elago,(GA) Eheke, Penehafo Mwashekuna (WA), Gabriel Taapopi, Sarty Shihweka ( C) Gabriel Taapopi,Katrina Nghatanga (WD) Mweshipandeka, Ester Amunyela (WD) Mweshipandeka.

LEAVE A REPLY

Please enter your comment!
Please enter your name here