Okongo oyo dhingi moateletika

0
34

Shipi Elago

Oshikandjolongo shaKongo osha ulukile iikandjolongo iikwa wo mOhangwena komutse gwondjamba Olyomakaya ga zi ko sho sha li sha mono omasindano omanene muudhano woAteletika woosikola dhoshitopolwa shawo mboka wa li pokapale koIndependence mOshakati.
Okongo oya li ya dhana nawa miinano ngaashi yoometa 3 000, 1 500, 800 noomota 400.

Omwaalu gwaanona ya konda pethele naalongi ye li 40 ya za moshitopolwa shoka oya li ya ngundumana pokapale kaShakati Olyomakaya ga ziko okutotha mo uunona mboka ta wu ka kalela po oshitopolwa shaHangwena muudhano woaAteletika wopashigwana mboka ta wu ka kala ko kuyele nuumvo.

Omunashipundi gwo NSSU mOhangwena Theo Mwashindange pethimbo a li moonkundathana naKundana okwa li a holola nkene oshitopolwa shaKongo sha li sha kangele iitopolwa iikwawo unene tu miinano iile.

Okwa ti nando oosikola odhindji dho mo shitopolwa shaKongo odhi li lela muushayi oku uvite kutya aalongisikola oya li ya longo nuudhiginini opo ya tule uunona womoosikola ndhoka pondondo ombwaanawa, onkene ota pandula oosikola opamwe naalongisikola mboka ya li yeshi ningi opo uudhano woAteletika wu tsikile nesimano ndyoka lya kala li shiwike nalyo moosikola.

Okwa ti molwompumbwe yiikwa niipangitho yomaudhano moshitopolwa shaHangwena, oya li ye na oku enda oshinano oshile okuya kOshakati hoka oko akuke kuna okapale ke li pamuthika gwopauyuni opo ya pe uunona ontseyo yagwana no ku ya eta pamuthika ngoka ta gu ka longithwa kedhingoloko lyopashigwana.

Kakele kiilongitho yomaudhano Muashindange okwa li a holola kutya oya li ye na omukundu gwiiyenditho okuthikitha aanasikola kOshakati naashika osha li sha thiminike oosikola dhimwe dhi kale inaa dhi tuma uunona.

Okwa ti oya taalela omukundu gwoosikola itaa dhi futu oompale dhadho kehangano lyomaudhano lyoosikola NSSU ndyoka li na oshinakugwanithwa sho ku unganeka omaudhano agehe moshitopolwa shaHangwena.

“Oosikola odha pumbwa oku futa oodola mbali kehe mokanona ke li posikola mo mumvo kehe gwosikola ashike, oosikola owala dhimwe hadhi shi ningi, naashika otashi longitha ehangano nuudhigu moku andjaganeka uudhano moshitopolwa shetu,” Muashindange ta ti.
Oshitopolwa shaHangwena oshi li shimwe shomiitopolwa hayi tilika ngele otashi ya po ku matuka iinano iile nongele omundilo ngoka ya li ya ulika ehulilo shiwike lya ziko ota gu tsikile nena iitopolwa iikwawo na yi ninge omutilo oshoka Ohangwena oko ta yi zi hoka.

Iitopolwa ayihe moshilongo otayi ongekidha oosipana dhiitopolwa yadho moka oshitopolwa shaOmusati sha tegelelwa shi ka kakale nuudhano washo wo Ateletika momasiku 28 gwomwedhi nguka, omanga Oshana tashi ka kala nuudhano washo momasiku 10-11 ga Maalitsa uudhano awuhe ota wu ka dhanenwa pokapale kemanguluko mOshakati.

LEAVE A REPLY

Please enter your comment!
Please enter your name here