Uunona waayelele wi iyaka ko kosikola

0
112

Loide Jason

ONGWEDIVA-Aanona yaayelele mboka yali ya falwa kosikola kepangelo konima sho yali yi iyaka ko kosikola onkee ngaa natango yi iyaka ko ishewe.

Aanona mbaka oomboka yali inaa ya ya kosikola uule woomvula dhi vulithe pu mbali sho ya monenwa omahala kosikola yedhina Uutsathima ndjoka woo yi na omuhandjo.

Aanona mbaka oyali ya kala pevi sho osikola mpoka ya kala hugunina pwali kaa pu na we ondondo ndjoka ya landulako. Yo ishewe kaya li taya vulu okukala ye enda oshinano shuule wookilometa dhi vulithe pomilongo ndatu oshoka oyena ashike omimvo dhili kohi yomulongo.
Omunambelewa ngoka a li ta ungaunga noshikondo sho kuhumitha aayelele komeho okwa li a ningi onkambadhala opo eke ya kongele omahala yo ya wape okukala ya tsikila nelongo lyawo.

Senia Endjala ngoka a kalela po ombelewa yOmupevi Presidente okwa li a yi pamwe nakansela gwoshikandjohogololo shoka Johannes Iyambo ke hala hoka opo ya wa pe okukandula po omukundu nguka.

Ashike ngashingeyi Endjala okwa ti shika oshe mu yemateka noonkondo adhihe nepangelo olya longa mpoka tali vuli okukwathela ashike aanona mbaka otaya hepitha oonkondo noshowo oonzo dhepangelo.

Oonzo dha popiwa kuEndjala oondhoka aniwa ngaashi omahooli gepangelo ngoka ga hingwa okukakonga aanona mbaka komagumbo gawo nokuyafala kosikola noshowo oondalaha ndhoka ya landelwa kepangelo.

Shika osha geyitha Endjala noonkondo oshoka ota ti mbaka ina ya pandula kwaashoka ya ningilwa kepangelo.
“Aanona mbaka oya pumbwa okukumikwa opo ya kale ya dhiginina elongo ndika oshoka ngele inaya tsuwa omukumo nena otaya ka hulila muunyengwi, ihe tse otwa hala ehumo komeho neputuko momihoko adhihe,” osho Endjala a popi ngaaka komeho gaavali mboka yali yi ikwata pomitima sho aanona yawo ya kala ya kuutumba pevi.

Shika osha etithwa uunene sho aavali mbaka kaa ye na omakwatathano naavali mboka ye na omagumbo geli popepi noosikola opo oyana ya ka tsikile nelongo ngaashi aanona ooyakwawo.
Ihe shika Endjala okwa ti okuna okukala eshi kandula po opomuhoko gwaayelele mboka gu kale woo nagwo gwaya kokule ngele tashiya melongo.

Ashike Endjala okwa li woo a longitha ompito ndjoka okutakela aavali omunwe kutya hamuvali wee ta keelele omunona kosikola unene ngele ye ya pomagumbo nefudho.

Kansela Iyambo okwa li wo na ye a kumagidha aavali mbaka ya hulithe po okuya nuunona koondingosho ta ti otashi yonagula po oku kala mwenyo kwaanona yo ya ka kale yena onkalamwenyo dha nkundipala.
Sho Kundana a popi nuunona mboka woo wali wa umbwa komeho kaavali wu ka kongelwe osikola owali wa holola omadhilaadhilo gawo kutya owa hala wu ye kosikola opo wu vule okuyambula po okukalamwenyo kwawo noshowo oofamilia dhawo ngaashi tashi vulika.

LEAVE A REPLY

Please enter your comment!
Please enter your name here