Aafekelwa yatatu ya pewa yiifutilemo mokakuma

0
141

Maria Namupala

ONDANGWA-Ompangu ya mangestrata gOndangwa oshiwike sha piti oya gandja obooloha yooN$1000, kaafekelwa yatatu mboka ya tulilwe miipandeko omasiku ga piti shi na sha noshiponga moka mwa hulithila aantu yatano, sha ningilwa mondjila ya Eenhana-Oshigambo.
Aafekelwa mboka Juniors Theophelus, Japhet Shikale na Simon Abel, oya li ya holoka oshikando shotango mompangu nokwa li ya tindilwa ompito yokwiifutilamo. Oshiwike shika sho ya galukile mo oya ka pewa obooloha ayehe kehe gumwe a fute ooN$1000.

Pethimbo ndika ayehe oyeli kondje yondjedhililo noya kunkililwa kaa ya ye omakonakono gopolisi moshipala. Oya holoka komeho gomupanguli Peter Nangula nomweetipo gwiihokolola Charly Tangeni Iyambo.

Ayehe yatatu ya tulwa miipandeko oyo mwene gweloli, ngoka a li iinekelwa okuli hinga naangoka wo a adhika ta hingi pethimbo lyoshiponga, nokwa lopotwa kutya kena omukanda gokuhinga sho osho shemu tulitha miipandeko, omanga yalwe yaali ya tulwa miipandeko molwaashoka oya pitike omufekelwa a hinge nonande kena omukanda gokuhinga.

Abel ota tamanekelwa oshipotha shedhipago lyaashi lyoshiningilawina, nokuhinga osheenditho keena omukanda pitikilo, omanga aatamanekwa yaali taya tamanekelwa sho ya pitike omuhingi a hinge osheenditho shoka keena ombapila yokuhinga nokweetitha oshiponga.
Oshipotha shawo oshuundulilwa komasiku gahamano 6 Juni nuumvo, shi gandje ompito kopolisi yi manithe omakonakono.

Oonakusa ayehe yatano oyali mosheenditho shoka shobaki nomadhina gawo oyo omuhingi Johannes Tomas 65, Wilka Mwatile 21, Benedict Shikongo 8, Leefa Alugodhi 27 nokanona ke koomvula 2 Theresia Mungunda, ayehe oya yambukile pomukunda Onamukulo.
Natango ompangu ya mangestrata gwOndangwa oya gandja obooloha yoshimaliwa shooN$ 6000 kaafekelwa yahamano mboka ya tulwa miipandeko mOshakati taya tamanekelwa uulunga nuufuthi wiimuna.

Omupopiliko gopolisi moshitopolwa Oshana Frieda Shikole okwa koleke etiyali kutya aafekelwa mboka sho ya holoka mompangu oya pewa ompito yokwiifutilamo.

Aafekelwa mboka oyo Bonifatius Haufiku 42, Mika Mateus 24, Ishidulu Rudolf 21, Simon Gotrieb 29, Daniel Jerry 53 na Kandjulu Ashipala 25. Yatatu yomaafekelwa oya li ya adhika mOshakati ya humbata oonyama dhoongombe mosheenditho shawo.
Omukonakoni nomukwatakanithi koshikondo shiimbuluma moshitopolwa shoka Hilya Haipumbu okwa ti mboka oya kwatwa po molwaashoka oya ndopa okugandja uukwatya wa mwene goongombe shoka sha thiminike opolisi yi ya tule miityaka.

Yamwe yatatu oyaka tulwa miipandeko lwanima sho konima yomakonakono she ya puuyelele kutya nani oye li elyenge lyokuyaka oongombe, ta ye dhi dhipaga nokulanditha onyama, ayehe ohaya kala komalukalwa ngaashi Oshoopala nOneshila momudhingoloko gwOshakati.
Opolisi oya pondola okukwatako uupapa woongombe wuli 17, omitse dhoongombe, ooniga na yilwe mbyoka yaadhika naafekelwa. Oshipotha shawo oshuundulilwa komasiku 31 Mai, shi gandje ompito kopolisi yi manithe omakonakono.

LEAVE A REPLY

Please enter your comment!
Please enter your name here