Omulongwa dhingi mOshikoto a pewa ondema

0
2244

Maria Namupala

ONIIPA-Omugandjimayele gwaNgoloneya goshitopolwa Oshikoto, nelenga lyomukunda Oshivelo, Erwin Nation Nashikaku, okwa gandja ongombe yondema komulongwa dhingi moshitopolwa oshiwike sha yi.

Nashikaku shika okwe shi ningi pethimbo lyoshiindingili shomapole moshitopolwa shoka, sha ningilwa posikola yopaumwene yoHeroes. “MuFebuluali omumvo gwa zi ko sho twa li twa gongala poshiindingili shafa oshikwawo, ondali nda ningi euvaneko kutya otandi ka gandja omagano komulongwa dhingi, nonda tokola opo ndi gwanithe po euvaneko lyandje montaneho yaakwashituthi ayehe,” Nashikaku a popi ngaaka.

Anna Hishitile a yambukile komukunda Okaku omulongwa kosikola yopombanda Oshigambo, nokwa mono iitsa 42 mekonakono lyondondo onti-10 omumvo gwaziko, nokwe ya gotango moshitopolwa ashihe, omanga moshilongo eya omutitatu.

Ye pamwe naakuluntu ye oyali ya gongala nokutaambako omagano ngoka gongombe a nuninwa, Nashikaku ta ti okwa gandja ongombe ndjoka nelalakano opo yi ke mu valele oongombe odhindji, ye a ninge omunafaalama emu fa.

Okwa gwedha po kutya ota kala ta gandja omagano komulongwa dhingi omumvo kehe, nelalakano lyokukumika aalongwa ooyakwawo ya longe nuudhiginini yo ya gwanithe po ashihe shoka taya lalakanene meilongo lyawo.

Kakele, kongombe ndjoka a pewa omagano okwa li woo a pewa omakopi, oonzapo niimaliwa opo eki ikwathe nayo. Anna Marry Hangula a za kosikola kEtosha okuulikwa omulongwa dhingi mondondo onti-12, sho a kangele ayehe moshitopolwa shoka.

Pethimbo ta popitha oshiindingili Omukuluntu gwelongo moshitopolwa Oshikoto Lameck Kafidi, okwa ti oshitopolwa shawo osho shimwe tashi longo nuudhiginini ngele tashi ya kokugandja elongo, nolundji ohashi gandja iizemo tayi shambula.

Kafidi okwa ti omumvo gwa zi ko aalongwa 3 418 oya nyolele ekonakono lyahugunina lyokomumvo mo , moka ooperesenda 72.6 yeshi pondola okuya kondondo onti-11. Okwa ti nando otaye shi enditha nawa, okwa holola euvo nayi lye kiizemo yondondo onti-12 mbyoka ya nkundipala unene.

Ngoloneya goshitopolwa Oshikoto Henock Kankoshi naye okwali a popi aayenda, ta indile aalongi ya tsikile okwiitula miilonga yawo, yo ya kale iiholelwa iiwanawa kaalongwa, noku eta iizemo iiwanawa notayi shambula pehulilo lyomumvo.
Oshituthi shika osha li sha kwashilipalekwa kuNORED, Free Namibian Caterers, Dundee Tsumeb Community Trust okutumbula po ashike gamwe.

Aalongi, aavali aalongwa osho wo aaniilonga moshikondo shelongo moshitopolwa oya li ya tumbalekwa nokupewa omakopi, oonzapo na yilwe oyindji omolwiilongapondoli yawo mbyoka ya longo momukokomoko gomumvo gwa yi.

LEAVE A REPLY

Please enter your comment!
Please enter your name here