Omupevi presidente a yambekelwa oshilonga she

0
407

Maria Namupala

OLUKONDA-Konima yomasiku omashona sho a li yelwa a ninge Omupevipresidente goshilongo Nangolo Mbumba, okwa talelepo egongalo lyaandjawo Olukonda Osoondaha ya ziko, ye ta yambekelwa oshinakugwanithwa shoka iinekelelwa.

Esiku ndyoka elongelokalunga olyali lya ningwa ngaashi shito nokonima yalyo Omupevi presidente pamwe nomukulukadhi gwe oyali ya yambekwa pamwe komusita ta wilike egongalo ndyoka Simon Iitula nomusita eli moshipundi shevululuko Johannes Mvula.
Mbumba okwa kala Amushanga Ndjayi gongundu yoSWAPO oomvula dha piti, nomasigu ga zi ko okwa ulikwa

kOmupresidente Hage Geingob a ninge Omupevi presidente a pingene po Omundohotola Nickey Iyambo ngoka a yi moshipundi shevululuko.
Sho a yambekele Omupevipresidente moshilonga she, omusita Iitula okwe mu phalele oonkondo opo a yakule oshigwana nokugwanitha po iilonga mbyoka iinekelelwa, oshowo omukumo miilonga ayihe , ye te ya kumike ya longe pauyuuki nopamilandu.

Mepopitho lye Mbumba okwa pandula omahalelo yambeko omawanawa, noku uvaneke ta ka yakula oshigwana pwana ezimbuko. Okwa lombwele egongalo lyaandjawo kutya okwe li talelepo molwaashoka kegumbo okegumbo owala nando kukale kokule shi thike peni.
Okwa kumike aavali ya kale noku tuma aanona yawo komanongelo molwaashoka oyo aaleli yokomongula, noshigwana osha pumbwa aantu ya longwa taya vulu okweeta omahumokomeho momidhingoloko dhawo.

“Aavali one muna oshinakugwanithwa oshinene meputudho lyaanona yeni, ko ohakuti elongo ohali tameke megumbo, onkene pompito ndjino onda hala okumu kumika mu kale aluhe tamu ya yambidhidha nokuya tekulila omikalo omiwanawa, ndhoka tadhi ya kaleke mondjila ombwaanawa no tayi tungu,” Mbumba ta ti.

Okwa ti aanona oya pumbwa okutulwa pokati kaavali oshowo aalongi opo ya kale yeshi shoka taya lalakanene, yo taya tekulilwa esimaneko nevuliko opo aluhe ya kale nelago ngaashi oshipango oshinene tashi ti.
Mbumba okwa indile wo aavali oyendji mboka kwa konekwa yaana esiloshimpwiyu momagumbo, no iha ya kuthombinga melongo lyoyana, yeshi ethe po yo ya tameke okudhana onkandangala melongo lyaanona yawo.

LEAVE A REPLY

Please enter your comment!
Please enter your name here