Onakuyiwa ya Young Brave FC moliha oyi li muudhigu

0
41

Shipi Elago

OSHAKATI-Osipana yoYoung Brave ndjoka ha yi dhana moliha yoSecond Division yaShana oyi li muudhigu sho inaa yi futa iigandjwa yayo kewiliko lyoNFA mOshana.

Ewiliko lyoliha yaShana omvula ya zi ko olya li lya mweneke oliha ndjika sho owala kwa li kuna uudhano uushona opo yi pwe naashika osha li she etithwa koosipana ndhoka inaa dhi futa iimaliwa yadho yuukwashilyo.
Oosipana odha li dha pewa ethimbo opo dhi gandje iifuta yadho opo oliha yi tameke, oosipana odha li dha yamukula kehiyo ndika nokufuta oondjo dhadho.

Sho oliha ndjika ya li ya tameke osipana yoYoung Brave oyo ayike ya li inaa yi mana okufuta iigandjwa yayo na ina yi pitikwa yi kuthe ombinga omanga iigandjwa yayo inaa yi gwana po.
Pamilandu dhaNFA osipana ngele oya ndopa okudhana omaudhano goliha gatatu ga landulalthana nena osipana ndjoka ota yi gumo moliha ya hala nenge inaa yi hala.

Molwonkalo ndjika Young Brave okwa li a ndopa okudhana mehuliloshiwike lya yi onkene ngele okwa ndopa ishewe ehuliloshiwike tali ya nena ota kala ko ashike nuudhano wumwe mboka ngele okwa ndopa ishewe oku dhana nena ote ki iyadha ta gu mo moliha.
Pauyelele mboka twa mona po, osipana yoYoung Brave oya futako iimaliwa N$ 990 na oya kambitha ko N$ 810, ashike okumwe negeelo lyoodola N$ 450 ,sho a ndopa okudhana uudhano woliha ehuliloshiwike naashika osha thikameke eta oongunga dhe pooN$ 1260, no ngele okwa ndopa oku dhana ishewe uudhano wa landulako nena ota ka gwedhelwa ko ishewe egeelo lyo N$ 450.

Osipana ngele oya ndopa okwi iyutha koompango nomilandu dhaNFA nena oha yi gwile wo muudhigu oshoka ita yi ka pitikwa yi kuthe ombinga we momaudhano gaNFA nooliha ndhoka dhi imanga kumwe na NFA .

Omunambelewa gwoNFA mOshana Sam Nekwaya okwa li a holola kutya oosipana ndhoka ha dhi gu moliha yawo oha dhi gwile moliha yokoMaalala, ashike okwa li wo a holola kutya ngele Young Brave okwe etha a gwe mo moliha nena itaka pitikwa wo a kuthe ombinga moliha yo ko Maalala hoka ha ku gwile oosipana ndhoka ha dhi gu mo Second Division yaShana.
Okwa ti ngele osipana ndjika oye etha yi gwe mo moliha nena na yi dhimbwe wo oku kutha ombinga momathigathano goNFA naangoka ga yama kuNFA.

Okwa li wo a fatulula kutya ngele osipana ndjika oya gumo moliha nena oosipana adhihe ndhoka dha li dha kutha iitsa momaudhano gawo na Young Brave ota ye ke yi kuthwa naashika woo tashi ka eta oosipana dhimwe dhi ka kale dha shuna pevi miitsa.
Osipana yoGolden Bigs oyo yili komeho moliha ndjika na oyi na iitsa 46 ta yi landulwa kosipana yoKhuse FC ndjoka yi niitsa 43 sho oliha ndjika yi na ko ashike omaudhano gaali opo yi thike pehulilo.

Onkene shipanga ota nyenge nangolo pombanda yoshitaafula sholiha ndjika oshoka oosipana ndhika mbali odho ashike dhili tadhi ningi namukata nathigale oku kiihakana koshishani sholiha.

Bigs ngele okwe etha a dhengwe ndele Khuse ta sindana po omaudhano ge nena Khuse otashi vulika a ka sindane po oliha, ashike ngele Khuse okwa dhengwa nena Bigs okwa pumbwa ashike oshi tsa shimwe ye okwa sindana po oliha.
Ashike ngele opuna osipana ya li ya kutha iitsa kosipana yoYoung Brave nena ota yi ka kuthwa ko na ota yi ka thiga oosipana dhimwe dhiikwata pomutima.

Oonkambadhala dho ku ninga ekwatathano nosipana yoYoung Brave odha li dha adha okwena kwa sho twa li twa hala oku uva shoka she yi kateka n aka pwa li uuyelele kutya omolwa shike inaa yi futa iigandwa yawo.

LEAVE A REPLY

Please enter your comment!
Please enter your name here