Oshigongiilonga shoondohotola naapangi mOndangwa

0
63

Maria Namupala

ONDANGWA-Ehangano lyoNamibia Surgical Society oshiwike sha zi ko olyali lyuunganeka oshigongiilonga shomasiku gatatu shoka shali sha nuninwa oondohotola naapangi yaza moshilongo oshowo kondje yoshilongo.

Shika oshali sha ningilwa mOndangwa, moka oondohotola 30 naapangi 15 mboka haya longo kiitandelo ya yooloka yali ya kutha ombinga nokukundathana. Omundohotola Akutu Munyika okwa yelitha kutya oshigongiilonga shika osha ningwa nelalakano okukundathana, nokugandja omayele nomilandu dha nkene iilongitho yokoshitandelo hayi kwatwa nokuopalekwa.

Munyika a ti esiku lyetameko oyali ya kundathana no ya pewa omalongo, naashika osha li sha kwatelamo iipangelo ngaashi Onandjokwe, Oshakati, Ongwediva MediPark nOndangwa Private. Oshigongiilonga shika osha ningwa woo okugandja uuyelele kombinga yomatando ga yooloka.

Munyika okwa ti pethimbo ndika iipangelo oyindji oya lundulula kombinga yomatando nopoompito odhindji omatando ngoka haga ga ningwa, omuvu oha ningwa owala, ombululu onshona okuyelekanitha nonale, molwaashoka aavu mboka ya li haya ningilwa omatando omanene oya li haya ululwa oombululu oonene ndhoka ihaadhi aluka mbala.

“Nonande katuna iilongitho ya gwana miipangelo yetu, otatu longo nuudhiginini okukwashilipaleka kutya aavu mboka ya pumbwa omatando oye ga ningilwa pamukalo omupu, opo ya tsikile noonkalamwenyo dhawo nuupu,” osho a gwedha po.

Okwa ti pethimbo lyoshigongiilonga aakuthimbinga oyali ya talele po iipangelo ngaashi Onandjokwe, noku ulukilwa yimwe yomiilongitho mbyoka hayi longithwa kiitandelo. Ta ti aavu 8 oya tandwa omatando ga yooloka moshipangelo Onandjokwe pethimbo ndyoka, omanga yeli 6 ya tandelwa mOndangwa Private, shoka a ti osha ningwa opo oondohotola yiitaleleko noku yelekanitha shoka ya longwa pethimbo lyomutumba.

Munyika ta ti oondohotola ndhoka odha za kiilongo ngaashi Zambia, Tanzania okutumbula po owala yimwe. Okwa koneke kutya oyi ilonga mo oshindji no ta ya ka topolelathana shoka ya mono po naaniilonga ooyakwawo koshikondo shuuhaku.
Minista yUundjolowele nonkalonawa Benard Haufiku okwa li naye a mono ompito opo a tsakanene naakuthimbinga olyomakaya. Haufiku okwa pandula komawiliko omawanawa miilonga nonande a holola kutya oyendji yomaayakuli miipangelo ka yena eyakulo ewanawa no ya pumbwa okulundulula, ya kale taya yakula aavu nawa ethimbo alihe.

Haufiku okwa ti aakwashigwana oya pumbwa okukala ya pashulwa kombinga yomatando ngoka haga ningwa ethimbo ndika, ta ti omuvu kehe okuna uuthemba okuhogolola kutya okwa hala etando lini.
Okwa holola wo kutya okwa pumbiwa omayakulo omahwepo niilongitho yi li pamuthika kiipangelo Katima Mulilo, Otjiwarongo, Opuwo oshowo Keetmanshoop.

LEAVE A REPLY

Please enter your comment!
Please enter your name here