Uudhano mUukule owali mombepo ombwaanawa

0
42

Maria Namupala

ONYAANYA-Uudhano wokomumvo woseko Uukule owa pu mombepo ombwaanawa, pahapu dhomunani gwawo.
Fares Mweya okwa ti aadhani ayehe ya za komanongelo 49 ngoka ga kuthombinga muudhano mbuka oya manitha uudhano mboka mombepo yi li nawa.

“Uudhano wetu owa li wa kwatelamo etanga lyokoompadhi lyaamati naakadhona, volleyball, oshowo etanga lyomokambamba, uudhano mbuka oweenda nawa noonkondo notwa pandula aadhani naakuthimbinga ayehe sho yu ulike eitulemo lyawo sigo twa adha pehulilo,” Mweya a ti.
Uudhano mbuka owali wa ningilwa pokapale ketanga mosekundeskola oyo tuu ndjika. Aadhani oyali taya dhana pwaana ezimbuko oshoka kehe gumwe okwali a hala oye a kale dhingi ye a faalele ekopi noshindji kosikola yawo.

“Otwa li twa hiya konyala oosikola adhihe miitopolwa yaWambo nale opo aanona yetu ye ye pamwe, yo ya tale nkene uudhano hawu dhanwa. Omanongelo 49 oga kuthombinga muudhano ngaashi etanga lyomokambamba, etanga lyokoompadhi lyaamati naakadhona, oshowo ovolleyball mono aathigathani ya li taya dhana lela etanga noku ulika iitalenti yawo,” Mweya a ti.

Muudhano wetanga lyokoompadhi lyaamati osikola Eheke oyo ya dhengemo adhihe no ye ya ponomola yotango, oya sindana ekopi, oombandi noshimaliwa shooN$1400, Nehale okwe ya puutiyali nokwa mono N$900 omanga Uukule na ye a ti ita kala inaa mona po sha molwaashoka oye eli omuunganeki gwawo, okwe etelele okano nokwa pewa N$700.

Muudhano wetanga lyomokambamba Gabriel Taapopi oye a sindana onomola yotango noya mono ekopi, oombandi noshimaliwa sho N$750, Haudano okwe ya puutiyali noku pewa ooN$600, naNuuyoma ye etelele okano.

Oshakati oya sindana po ekopi lyetanga lyokoompadhi lyaakadhona, omanga Andimba eya puutiyali sho a dhengwa medhingoloko lya hugunina, noG.T ye etelele okano. Muudhano wo Volleyball osikola yaPonhofi oye ya potango sho ya kangele adhihe, Nehale teya puutiyali nEkulo nalyo olya ti itali kala inaali faalela sha kegumbo.

Mweya okwa pandula oosikola adhihe dha li dha kutha ombinga muudhano mbuka ta holola kutya uudhano wonuumvo owa li owo wa shigako okuyeleka naamboka womimvo dha piti. Ta pandula aayambidhidhi ayehe ye ya kwatha opo ya pitithe otonamenda yawo ndjika.

LEAVE A REPLY

Please enter your comment!
Please enter your name here