Ya kundathana ehumokomeho moKuvukiland

0
26

Maria Namupala

TSUMEB-Oshiwike sha ziko aaleli mondoolopa yaTsumeb oya li yu unganeke oshigongi shotango shokomumvo, sha ningilwa molukalwa halu ithanwa Kuvukiland.

Oshigongi shoka osha li sha kuthwa ombinga kaakwashigwana, aanambelewa melelo lyondoolopa oshowo aanambelewa ya kalelapo opolisi mondoolopa oyo tuu ndjoka.Oshigongi osha ningwa nelalakano okutsakanena nokukundathana kombinga yomashongo ga yooloka.
Pethimbo a popitha aakwashigwana Mayola gondoolopa ndjoka Mathews Hangula okwa ti oshi li oshinakugwanithwa shelelo lyondoolopa kehe okukwashilipaleka kutya uuyelele owa pewa aakalimo ayehe, noshowo kutya mbaka oya tseyithilwa omahumokomeho taga inyenge momudhingoloko.

Hangula okwa ti oye enda ondjila onde okweetapo omahumokomeho, nelelo lyondoolopa olina omathaneko omanene okuhumithakomeho ondoolopa, yo ndjika yi kale yimwe yomwaandhoka tadhi imonikila moshilongo.

Mayola ta gwedhapo kutya Kuvukiland okwa totwapo mo 2009, nopethimbo ndyoka omwali owala hamu kala aantu yeli po 250 ashike mongashingeyi omuna aantu taya ihilile po 10 000. Okwa ti elalakano lyoshigongi oya hala yi ikunde manga omumvo guli petameko elela.
“Otwa hala okuyambula po omahala gomalukalwa mondoolopa dhetu, go ga kale pomuthika tagu nana nokweeta aatalelipo. Otwi ikundu nomahangano ga yooloka ngaashi Shack dwellers Federation no Namibia Housing Action Group oshowo galwe getu kwathele mokuthaaneka omalukalwa getu,” Hangula a ti.

Okwa ti oya hala opo aakwashigwana nayo ya kuthe ombinga mehumokomeho nomayambule po goondoolopa naashika ota ye shi ningi uuna taya gandja omathaneko nomadhiladhilo gawo unene kombinga yaa shoka ya hala shi ningwe kelelo lyondoolopa.

Okwa ti oyena omathaneko omanene, ngoka taga lalakanene okukutha aantu momagumbo giipeleki nokuya tula momagumbo gomakuma goshali.
Okwa uvaneke kutya elelo lyondoolopa olyi ilongekidha okukwatha oshigwana nokuthikitha omayakulo kusho. Okwa itaala wo kutya omashongo agehe ngoka ga taalela elelo lye otaya ka longa nuudhiginini opo ye ga kandulepo. Okwa kumike oshigwana shi yande iilonga yomiyonena.

Yamwe yomaakwashigwana mboka yali ya holoka koshigongi oya pula elelo lyondoolopa li tsikile okuyakula, nokulonga muuwanawa woshigwana.

LEAVE A REPLY

Please enter your comment!
Please enter your name here