Aadhani oya pumbwa omadhewo ga gwana –Eneas ta ti

0
25

Shipi Elago

Ongwediva-Enias Namupala, mwene gwoYAP Gym mOngwediva okwa li e tu kuthileko nkene shi li sha simana unene tu kaadhani okuninga omadhewo ngoka taga kwathele mokutungapo nawa omalutu gawo nokwiikaleka ye na uundjolowele.

Pamapekaapeko ngoka twa li twa ningi noosipana dhomoshitopolwa otwa li twa mono kutya oosipana ihadhi tumu aadhani yadho koongulu dhoku tunga po omalutu ano melaka lyoshitakumi hadhin ithanwa Gym.

Otwa li twa yi moonkundathana naEnias opo e tu kuthile ko ombahu nokawawa nkene omadhewo gwomoGym ge li ga simana unene tuu kaadhani.

“Omadhewo oge li okolonela neshukamugongo lyuudhano kehe na omudhani ngoka iha ningi omadhewo nena ita vulu oku shi enditha nawa momawudhano oshoka oha kala aluhe a loloka ngele okwa tameke okumatuka, omadhewo ohaga kwathele aadhani opo ya tule omalutu gawo pondondo ombwaanawa opo ngele taya kutha ombinga miikwamawudhano nena otaya vulu okulonga nuudhiginini ethimbo ele nokudhana pondondo yopombanda ina ya loloka.

Okwa ti nando olwindji aadhani yetu ohaya ningi ashike omadhewo gwokumatuka oku wete kutya ngoka ina ga gwana oku yelekanitha naangoka taya vulu oku mona koGym.

Ta ti ondjugo yomadhewo oyi na omashina ogendji ngoka taga vulu okukwathela okutunga po oontumba dholutu dha ndjanga na odhina omwago.

Okwa ti okuya koGym otaku kwathele wo omudhani a tseye mpoka pwa hulila oonkondo dholutu lwe na nkene e na oku ihumbata uuna olutu lwa thiki ponkatu mpoka italu vulu we okuya komeho nomadhewo.

Okwa li a holola kutya oya li ya gandja ompito yoshali yokwi idhewula kosipana yOshakati City moka aadhani ya li haya longitha oGym na osipana ndjika oya li ye ya pehala etiyali momumvo gwokatanga gwoPremier Liha.

Ashike okwa li a holola kutya oya li ya thiminikwa opo ya teye ewuvathano lyawo molwaashoka aadhani oyendji oya li ya kanitha omikalo na oya li ya teya po elandulathano lyomoGym.

Okwati ethimbo olya thika opo oosipana dhi kale hadhi fala aadhani koondjugo dhokwiidhewula opo ya pe aadhani ompito yokuhumitha komeho omatha gawo ngoka ya pumbwa uuna ye li momawudhano.

“Oosipana inadhi tegelela okuteya mpoka inadhi kuna ,ngele odha hala iiyimati iiwanawa nena odha pumbwa okukuna naashika otaye shi ningi okupitila momayidhewulo kehe, osipana oya pumbwa yi kale yi na oGym moka aadhani taya kala nokuninga omadhewo metonatelo lyomutseyi gwomalutu,”Enias ta tsikile ko ngaaka.

Okwa ti aadhani mboka ya mona omadhewo gi ihwa po ihaya mono omayehamo unene okuyelekanitha naamboka ihaya mono omadhewo inaga ihwa po.

“Mondjugo yokwiidhewulila omu na iilongitho oyindji yopashinanena mbyoka hatu longitha ngaashi okuhumbata oshiviha shoka hashi tungu oontumba dholutu, uumbasikela mboka tawu tungu oontumba nomithipa dhomagulu, nosho wo okukindjika omutima gu kale gwi igilila okulonga iilonga iidhigu naashi omudhani taka ya mokapale ota vulu okudhana ethimbo ele inaa loloka,”Eneas ta tsikile.
Okwa ti kehe oludhi luudhano olu na omadhewo ga yookola oshoka ohaga longitha iitopolwa ya yooloka yolutu onkene aatseyi yomadhewo oyo haya pe aadhani omayele kutya iilongitho yini tayi ya opalele.

LEAVE A REPLY

Please enter your comment!
Please enter your name here