Esiku lyakiintu tali tyapulilwa koZambezi nuumvo

0
24

Loide Jason

WINDHOEK-Esiku lyoomeme moshilongo nuumvo otali ka dhanena koshitopolwa shaZambezi, shika osha li sha tseyithwa komupeviminista moministeli gUukakwashikekookantu Lucia Witbooi momutumba gwopashigwana mEtiyali lyoshiwike shika.
Oshi li omukalondjigilile kutya Namibia naye woo oha kutha ombinga mokutyapula esiku ndika oshoka ohali dhanwa pandondo yopashigwana muuyuni.

Witbooi okwa hokolola kutya esiku ndika otali ka patululwa kuminista nUukakwashikekookantu omusimanekwa Doreen Sioka, naashika otashi ka dhanwa miitopolwa ayihe yi li omulongo14.

Kehe omumvo moshilongo shika momasiku ge li 08 gaMaalitsa esiku ndika ohali tyapulwa nonuumvo ongashikwawo.
“Ndino esiku moka aakulukadhi miikondo ayihe noshowo monkalamwenyo ya yooloka pamuthigululwakalo, palwaala nenge papolitika haye ya pamwe e taya tyapula esiku lyawo ndyoka lye ya nuninwa,” osho Witbooi a hokolola ngaaka.

Okwa ti esiku ndika otali kwandjengele nokutambulako omasindano nomayambidhidho ga ningwa koomeme, moka mwa kwatelwa omahupilo gopankalathano, omithigululwakalo, osho wo omasindano nomasindano gopapolitika. Ndjika oyo ompito ya sheywa oku ulika meukililo omasindano ngoka ga adhika koomememe osho wo omashongo ngoka ya taalela ngele tashi ya komahupilonkalathano osho wo emanguluko lyopapolitika.

Okwa tsikile ko ta ti kutya moNamibia nuumvo esiku ndika otali tyapulwa koshi yoshipalanyolo “from peace in the home, to peace in Namibia: Press for Progress.

Onkee uuminsteli mbuka otawu indile noonkondo opo omahangano agehe ngoka ga yama koshinima shika gi itule mo okuhumitha komeho nokutula miilonga oompango nomisindalandu dhopashigwana, pauyuni nosho wo okunkondopaleka oomeme, nuuthikepamwe.

“ Tulongeni nuudhiginini opo tu kaleni tu sheni kutya aakiintu nuunona inaya hupa ko shina sha netyapuloshituthi shika oshi ti-62 okuyeyelula po omithika dhoomeme. Opo, tu yeni komeho, natu kwashilipalekeni kutya oomeme nuunona wokiitopolwa yokuushayi oya gamenwa yootaya nkondopalekwa,” osho omupeviminista a popi ngaaka.

Okwa ti kutya moshilandopangelo esiku ndika otali tyapulilwa pehala lyedhina Mix Settlement, omanga kiitopolwa yimwe omadhina oga tseyithwa nale.

LEAVE A REPLY

Please enter your comment!
Please enter your name here