Etalelepo lyaRamaphosa olyokutamukulula uukume waSA naNamibia

0
26

Loide Jason

WINDHOEK-Omupresidente gwoshishiindalongo shedhina South Africa okwa popi kutya etalelopo lye moNamibia olyokutamukulula nokunkondopaleka uukuume pokati kaNamibia naSouth Africa.

Dhika omupresidente Cyril Ramaphosa okwe dhi popi uusiku wEtitano sho e ya okutalela po omupresidente gwaNamibia Hage Geingob ngoka e mu tambula ko nomaako gaali.

Ramaphosa okwa ti kutya etalelopo ndika olyowina oshoka Namibia naSouth Africa oya kala nale oshipeta nonyala okuza mekondjelomanguluko, onkene ngaa ngashingeyi ya pumbwa oku nkondopaleka uukume mehumokomesho.

“Otu na elalakano nenenedhilaadhilo limwe, okuhuma komeho kumwe, nosho wo omayiuvo gamwe, onga iishindalongo,onkee mbyoka oyo yimwe mbyoka ye tu tula pamwe e tayi nkondopaleke uukuume wetu ,” osho Ramaphosa a lombwele Geingob ngaaka.

Omutse gwoshilongo shaSouth Africa ngoka a ningi ashike omwedhi gumwe moshilongo moka onga omupresitende okwa ti kutya ndika olya li ashike limwe lyomomatalelopo gwokupopya naaleli ooyakwawo oshoka opo a tameke iilonga na onkene aniwa ta ka galuka konakuyiwa opo ya popye muule shi na sha neliko lyopashimaliwa ndyoka tali tengauka muuyuni.

Okwa ti sho ta ka galuka ote ya woo okupyopya shi na sha niipindi, oonkundathana shi na sha noopolitika, ekwatathano lyi na sha nomuthigululwakalo nosho wo iikwawo oyindji mbyoka tayi vulu okuhumitha iilongo yopaali komeho.
Geingob okwa ti kutya ota halele Ramaphosa omahaleloyambeko sho a mono ompito yokuninga omupresidente omupeepeka gwoshilongo shoka, sho omupresidente omukulu Jacob Zuma a hulitha po iilonga ye yemwene.

Ramaphosa okwa li a hogololwa onga omupresidente gwongundu tayi pangele moshishiindalongo shoka sha tumbulwa pombanda muDesemba gwomumvo gwa yi.

Okwa hokolola kutya ekwatathano ndyoka li li pokati kiilongo mbika iyali olyo oshipatululo tashi ulike kutya mbaka otaya ka topolelathano elongelokumwe.

Omupresitende gwaNamibia okwa ti kutya ekwatathano ndyoka li li po oondyoka kutya ohaya longele kumwe ngele tashi ya piipindi oshoka kaku na oshilongo hashi humu komeho osho ashike inaashi yambidhidhwa kiikwawo.

“South Africa na tale ko Namibia onga kuume e li nawa ngele tashi ya piipindi oshoka ngashingeyi aniwa epingakanitho lyongushu yiipindi pokati kaNamibia naSouth Africa olya thikama piimaliwa yi thike poombiliona N$84, omumvo gwa zi ko ashike,” osho Geingob a koleke nkene ekwatathano lyiilongo mbika iyali.

Okwa ti kutya nonande ekwatathano lyiilongo mbika iyali olya kola onkee ngaa Namibia oye ta landa oshindji kuSouth Africa, shi thike poobiliona oondola N$49 omanga South Africa ha landa ko oshihwepo kunamibia shi thike poobiliona N$15.
Okwa tsikileko ta ti kutya Namibia ota tsikile nokusimaneka uunashipundi waRamaphosa sho a ningi omunashipundi gwaSADC.

LEAVE A REPLY

Please enter your comment!
Please enter your name here