Iitopolwa ihetatu ya pewa N$320 000 kuNored

0
135

Maria Namupala

ONDANGWA-Ehangano Lyokwaandjaganeka olusheno moshitopolwa shokonooli Nored olya gandja iimaliwa yoN$320 000, mu yimwe yomiitopolwa moshilongo. Shika osha thamunwa komunambelewa omukuluntu mehangano ndyoka, Toivo Shoovaleka.

Shoovaleka ndhika okwe dhi popi moonkundathana ndhoka twa ningi naye oshiwike shika. Ta yelitha kutya iitopolwa mbyoka ya pewa oshimaliwa shoka ongaashi Zambezi, iitopolwa ya Kavango iyali, Ohangwena, Oshikoto, Oshana, Omusati osho wo Kunene. Kehe shimwe shomiitopolwa mbyoka osha pewa oN$40 000.

Okwa tseyitha kutya ehangano lyawo olya mono sha opala opo li gandje moshigwana, shoka hashi ya yambidhidha aluhe, ta ti oya tokola opo ya pungule melongo, sho osho ya gandja oshimaliwa shoka kehe moshitopolwa.

Yimwe yomiitopolwa mbyoka ya pewa ngaashingeyi ongaashi Oshikoto, Oshana,iitopolwa iyali yaKavango oshowo Zambezi, okwa yelitha kutya iitopolwa mbyoka ya hupa ko natango otayi pewa yo ya tale kutya oshimaliwa shoka taye shi longitha ngiini.
“Oshimaliwa shika otwe shi gandja nelalakano koshikondo shelongo opo shoshene shi tale kutya otashi shi longitha ngiini, yo taya gandja olupandu kaalongwa mboka ya ninga nawa miilongwa yawo mwa kwatelwa aalongi,” Shoovaleka ta ti.

Okwa gwedha po ta ti ehangano olya shaina euvathanotsokumwe lyuule woomvula ndatu, opo li kale tali gandja, oshimaliwa shoka ku kehe oshitopolwa omumvo kehe, kakele koshimaliwa shoka ehangano lya gandja miimaliwa mbyoka omwa kwatelwa omakopi gaalongwa dhingi yatatu, aalongi dhingi miilongwa yOmwaalu, Oshiingilisa osho wo oPhysical Science.

Ta ti Nored okwa panga uukuume nuuministry welongo sho osho e na oshinakugwanithwa shokupungula melongo, ta ti natango onkene ta gandja oompito kaailongi mboka taya ilongele omaithano ga yooloka gopaungomba ya vule okwiimonena uunongo nontseyo omanga inaaya mana omailongo gawo.

Ohaya gandja omadheulo kaalongwa yokiiputudhilo yopombanda ngaashi NUST, UNAM na yilwe woo. Ta ti ohaya gandja oshimaliwa shoku ilongitha kaalongwa mboka ye li mompumbwe notaya nyengwa okwiifutila kuyo yene.

Shoovaleka ta pula omahangano ga yooloka moshilongo opo ga longithe ompito nokugandja sha koshikondo shelongo, nelalakano lyokupungula maaleli yokomongula ta ti naya kuthe iiholelwa komahangano ngoka haga yelutha oonyala.

Okwa pula aakwashigwana na yalwe ya tsikile okufuta omayalulo gawo golusheno, yo ya vule ya mone iiyemo ya kwathe mboka ye li mompumbwe, ta gwedha po kutya oya li ya kala pu yimwe yomiituthi yomapapa miitopolwa mbyoka ya tumbulwa metetekelo, noya gandja otyeke ndjoka yo N$40 000, nomiitopolwa yilwe oya taambwako kaakuluntu yelongo.

LEAVE A REPLY

Please enter your comment!
Please enter your name here