Limpopo ota ka kwafela Namibia okulwifa omikifi diimuna

0
37

Helvy Shaanika

Oshakati-Elelopangelo lopashitukulwa laLimpopo moSouth Africa ola udanekela oitukulwa konooli yaNamibia kutya ole li longekida opo li kwafe Namibia mokulwifa omikifi doinamwenyo, unene tuu okulwifa omukifi wekondo nelaka.

“Epangelo lopashitukulwa laLimpopo oli na eenghono ngeenge tashi ya kokulifwa omukifi wekondo nelaka. Ofye vamwe vomoitukulwa oyo i na eedjo da wana ngeenge oshe ya kokukondjifa omukifi ou. Onghee hano twa hala okukwafela oitukulwa yokonooli yaNamibia mokulwifa omikifi doimuna,” oshilyo shElelo aLimpopo Charlse Seaparo Sekoati ta ti.

Okwe shi popya pefimbo vali tava shaina omikanda detwokumwe-udafano, noshitukulwa shaMusati, Oshana, Ohangwena nOshikoto mOshakati oshivike shadja ko. Oshana oshakalelwapo kwa li ku Gerson Kapenda, Erickson Ndawanifa okwa li akalela po Ohangwena, Modestus Amutse ta kalelepo Omusati, omanga Samuel Shivute a li a kalela po Oshikoto.

Oshitukulwa shokonooli naikwao oyo i na omadu aaveshe oyo ya tetwa ko nokutongolwa ko komadu okoushimba molwaasho kwa itaveliwa kutya oitukulwa ei oi na omukifi wekondo nelaka oo taku tiwa ohau kwata oinamwenyo yokonooli okudilila moAngola.

Omolwa omukifi oo, ovanaimuna koitukulwa yaaveshe inava kala va ufwa okulandifa oinamwenyo yavo, ombelela ile omashini nakeshe tuu osho hashi di moinamwenyo kondje yomufinda mutilyana molwa oumbada kutya otai dulu oku tandavelifa omukifi.

Ashike nande ongaha ovanaimuna kondje yomufinda mutilyana ova kala tava pula opo omufinda oo u kufwe po shaashi onghee wa tulilwe po pefimbo loukoloni kepangelo lokatongotongo. Tava ti omufinda oo owa talika ko onga imwe yomeeveta dokatongotongo odo fiyo onena di li moilonga.

“Fye otwe li longekida okulongela kumwe nomalelo opaitukulwa ngaashi Oshana, Omusati, Ohangwena nOshikoto. Nande omoshivike tashi ya ngeenge omalelo oo ane okwa pyakudukwa ohatu tameke ashike nokudeula ovanambelewa,” Sekoati ta ti.
Etwokumweudafano pokati komawiliko opaitukulwa ei ine yaNamibia noshaLimpopo shaSouth Africa, ola shainwa konima yeedula omulongo eshi kwa li ngeno kwa tokolwa opo ngeno li shainwe mo2008.

Ashike okangudulongekidi oko kali taka toto po omilandu nomaufomhango ina ke shi pondola okumana okutota po eeveta odo pefimbo.
Kakele komikifi doinamwenyo omapangelo aa avali okupitila moitukulwa yopapangelo oyo otaa ka longela pamwe moikondo ngaashi yopaipindi unene tuu okutala komaongo oo haanuwa moNamibia naSouth Africa. Fiyo onena omaongo moNamibia inaa mangulukila omalandifilo aaveshe mwa kwatelwa opashitukulwa ile ounyuni.
Otave ke likwafela yoo moshikondo shomapashiyono.

Ngoloneya waShana Clemens Kashuupulwa oo a popya ponhele yoogavena vakwao okwa ti etwokumweudafano otali ulike onakudiwa yelongelokumwe pokati koshiwana shaSouth Africa naNamibia olo la dja eedula donale.

“Onda hala okupandula epangelo lopashitukulwa laLimpopo eshi la itavela okutukwafela nokuxwepopeka eenghalamwenyo dovanhu vetu… Onde lineekela kutya etwokumweudafano eli otali ka koleka ekwatafano liwa letu oli li li po nale moimhungu ngaashi shopaliko, panghalafano, omifyuululwakalo, neyambulepo leliko lomapashiyono,” Kashuupulwa ta ti.
Kashuupulwa ta pula oitukulwa ikwao yomoshilongo opo i kale nokupanga oukaume noiwana imwe mounyuni opo i yambulepo nokutunga po omakwatafano opaliko e li nawa.

Omolwa etwokumweudafano eli ohatu oshitukulwa shaShana, Ohangwena, Oshikoto nOmusati otai ka longela kumwe nepangelo lopashitukulwa laLimpopo okupitila mokutukulilafana ouyelele wounamapya nounaimuna, omapashiyono, elongo, oundjolowele nounangeshefa wopetameko,” Kashuupulwa ta ti.

LEAVE A REPLY

Please enter your comment!
Please enter your name here