Museum Association of Namibia a longekidha omutumba gokuyambulapo oongalo

0
29

Maria Namupala

OMUTHIYA-Ehangano lyoMuseum Association of Namibia olya li lya longekidha omutumba gowina moka aakuthimbinga ya li ya gongala noku kundathana nkene ye na okuyambulapo nokuhumitha komeho oongalo moshilongo.

Omugandjimulombo Ndapewoshali Ashipala okwa yelitha kutya omutumba nguka ogwa hili aakuthimbinga ya yooloka mboka unene ye na ohokwe moomusika, ya li taya paathana uuyelele nokutala mpoka ye na oku endekulula.

Ta gwedha po kutya gotango ogwa ningilwa mondoolopa yaMuthiya na gulwe gwa ningilwa mOndangwa. Okwa yelitha kutya iikondo ya yooloka unene yoonkuluhedhi nomithigululwakalo nayo oyali ya tuma aakalelipo yawo, yo ya kundathane.

Ashipala ta ti molwaashoka oongulu dhiikulunima moshilongo odha totwa po okunkondopaleka omithigululwakalo noohedhi, opwa totwa opoloyeka yoku dhi yambulapo, noya tulilwe miilonga muNovomba omumvo gwa za ko. Opoloyeka ndjoka oya kwashilipalekwa koEuropean Union noshimaliwa shoomiliona N$3.4, notayi kwata uule woomvula mbali.

Moshigongiilonga moka oyi ikundu nkene ye na okukaleka po omithigululwakalo, nonkene ye na okulongulula iinima mbyoka ya kala hayi longithwa monale. Okwa ti opu na oongulu dhiikulunima moshilongo ndhoka dha pumbwa okuyambulwapo naashoka Ashipala otati otashi ningwa owala uuna aaNamibia koombinga noombinga taya longele kumwe notaya nana mepaya limwe.

Ngoka a li natango a popi pomutumba omundohotola Sam Shikongo nokwati omithigululwakalo moshilongo ashihe odha pumbwa okuyambulwapo, nonkene aantu oya pumbwa ye dhi kaleke po dhi vule okulongwa noku ulukilwa aanona mboka opo taya putuka.
Shikongo ta yelitha kutya opu na omahala ogendji gopamuthigululwakalo ga pumbwa okuyambulwapo nokuhumithwa komeho, ta gandja oshiholelwa ngaashi ombila yomukwaaniilwa Nehale lyaMpingana ndjoka ta ti oya pumbwa okutulwa ondhimbuluthothano yo yi kale tayi imonikila.

Ta gwedhapo kutya oya pandula ehangano ndyoka sho lya mono sho opala opo ku totwe oongulu dhiikulunima miitopolwa iyali ngaashi Zambezi nOshikoto, ta ti oye na omukumo kutya otadhi ka ninga eyooloko enene miitopolwa mbyoka, noku ulika omathano gaaleli yonale, iihongomwa yookuku naayihe mbyoka ya nika omithigululwakalo.

Shikongo ta yelitha kutya opu na omathaneko opo ku ka totwe omahala gokuulika iihongomwa niilikololomwa tashi kala tashi ningwa omalupita unene monooli yoshilongo. “Omithigululwakalo oko hoka twa thikamena, notwa pumbwa oku dhi kalekapo noku dhi simaneka, tse tu kale oko twa kankamena ethimbo kehe, ohaku tiwa oshilongo shaa na omithigululwakalo osha fa olweendo lwa tumba lwaa na mpoka lwa thinda, onkene natu dhi yambuleni po,” ta gwedhapo ngaaka.

Okwa ti oya hala opo ya simaneke oongalo naahiki yadho, noya hala oku dhi yambulapo, yo taya galula oongalo ndhoka dha imbwa kaahikingalo yonale, dho dhi kale tadhi pulakenwa molwaashoka onkene dhi na etumwalaka tali tungu.

LEAVE A REPLY

Please enter your comment!
Please enter your name here