Oifitukuti otai pe ovanamukunda ovaTanzania oyuuyemo

0
67

Derek E. Lee

Efimbo eli lopaife, osha pumba okuuda onghundana iwa ina sha noushitwe nonomudingonoko. Ashike moTanzania omu na ekalekopo loushitwe neameno leedjo dopaushitwe tali ningwa koshiwna olo tali eta exumokomesho nekulo leliko loshilongo.

Tanzania oku li oshilongo shafimana moilongo yaAfrica lokoushilo ngeenge tashi ya kongeshefa youtalelipo noupashiyoni. Outalelipo moshilongo osho ohau eta mo konyala oshimiliwa shi fike peebiliona US$6 keshe kodula. Ohashi eta mo oshitine shoimaliwa oyo hai di kondje, sha pitilila poshikondo shoikwamina noikwaenghono. Hano outalelipo needjo dopaushitwe moTanzania oya kalela po konyala eepelesenda 13% deliko loilongwamo oyo hai longwa moTanzania, nowa kuta konyala ovanhu vefike po700 000 meyukililo nowa yandja yo oilonga kovanhu omiliona 1.5 shihe li meyukililo.

Eedjo doinamweyo yomoixwa moTanzania oda kwatwa nawa shaashi oda kwatela mo nomaluxwa a hapa nawa oo taa eta omakwatafano opaushitwe pokati koifitukuti noixwa e li nawa. Oshilongo osho oshi na yoo omuvalu munene womainyengo oifitukuti oyo hai nyamifa ngaashi eengalangobe, eemhuulu neengolo nelinyengo olo ola shivika oonga Serengeti wildebeest migration. Oshi li yoo eumbo koinamweyo oikongo oyo hai kala moNgorongoro neendjaba moTarangire.

Ashike eameno loifitukuti moTanzania oli li moshiponga. Oshilongo osha talelwa koukongo uheli paveta nosho yo omalipumomumwe ovanhu noinamwenyo oo a kwatela mo oyeeti mo imwe yeliko ngaashi ounamapya nounaimuna noikwamina.

Kakele kwaasho, oyuuyemo oyo hai dilile meameno loifitukuti ihai tukulilwa oshiwana shifike pamwe. Oshiwana shomomidingonoko omo mu na oifitukuti oshi li moluhepo neenghono, okuyelekanifa novakalimo koitukulwa imwe yokoushai.
Ashike onghundana iwa oyoyo kutya, ekalekepo loifitukuti otali dulu okulundulula eenghalamwenyo noushitwe oo wa li wa nyonauka.

Okutula oshiwana monomola yotete
Omapekapeko a ningwa kombaanga younyuni (World Bank) okwa mona kutya eengeshefa doweendaendi nomatelelepo mounyuni odo tadi etwa keputuko otadi ka dja ongushu ndele ongeshefa yovatalelipo yaTanzania oyo yoinamwenyo neameno loushitwe oyo tai ka kala ya talika kuvahapu.

Omushangwahokololo oo owa yandja omayele kutya ngeenge okwa halika ongeshefa oyo youtalilipo i nenepale, naku li amekwe kengushupalo layo ndele hakomivalu deengeshefa. Koo vali naku ningwe omakwatafano mawa neengeshefa domoshilongo ashishe, tashi tameke nokutukulilafana omauwa novanhu vopomudingonoko.

Omukalo oo ou li omutima wokukwatela po eedjo doushitwe odo hadi filwa oshisho kovakwashiwana. Eshi sha fimana osho sho ngeenge eenghono dokufila oshisho nokukwatela po eedjo edi dopaushitwe oda kufwa ko kepangelo ndele tadi pewa ovakwashiwana ovo tava kala ve udite oumwene weepoloyeka doinamwenyo. Omukalo ou otau longifwa luhapu notau longele oiwana ihapu.

Omukalo wovakwashiwana momikunda moTanzania okukaleka po eliko loinamwenyo owa talika ko muwa nokukaleka po oushitwe woinamwenyo yomoixwa. Moshilongo osho omikunda dihapu oda tenda ko eenhele donhumba da ningilwa eetepo loshimaliwa okudilila moshinyangadalwa eshi shoupashiyoni nomatalelepo. Eshi otashi kwafa okuhonga noukudeula ovanamikunda mekwatelepo leedjo dopaushitwe.

Eenghono deepooyeka odo dokudeula ovanhu mekaleko po loushitwe ina di didilikwa naanaa. Omapekaapeko a ningilwe pomafimbo aa otaa ulike kutya eepelesenda ashike 13 domeepoloyeka 159 domomikunda hadi tale kutya eameno loushitwe ohali kwafa ngahelipi ekalekopo loushitwe wedu.

Ehapupalo loifitukuti oli na yoo enwefemo momuvalu weengobe. Komuvalu munene woifitukuti oko ngaho keninipalo lomuvalu weengobe moshitukulwa naashi ohashi kwafa okungushupika edu noku eta elunduluko liwa mounamapya. Eshi otashi dulika shi kumike ovakwashiwana opo va kale velitula unene meameno loushitwe. Neepoloyeka doludi eli otadi kwafa okuyambula po eudeko lovanamukunda. – The Conversation

•Derek E. Lee oye omuprofesori poPennsylvania State University

LEAVE A REPLY

Please enter your comment!
Please enter your name here