Ongwediva tayi ulike kutya ehumithokomeho lyaanyasha ohali tameke momututu gwegumbo

0
49

Okupopya kombinga yokuhumitha komeho aanyasha oshinima oshipu noonkondo, ashike okukala wu na oopolohalama dhoka tadhi ungaunga nohumithikomeho ndika oshinima shi ili thiluthilu. Shoka tashi etitha olukeno osho shoka kutya hamalelo ogendji gopaitopolwa nenge gopaendoolopa ge na oopolohalama dhokuyambula po aanyasha miitopolwa yawo. Shoka osho tashi thiminike aanyasha oyendji yi idhenge oondjila oondeendeka yu uka hoka taya dhiladhila ku na uunapelo u li hwepo ngaashi KOvenduka, Oliindili, osho woKombaye, nelalakano lyi ka ye ngeno momupini. Oondoolopa odhindji dhopopepi naakalimo mbaka kadhi na oompito dhiilonga mbyoka hayi futu oondjambi dhopetameko.Omalelo goondoolopa ogendji oga ndopa okukeelela aantu yaa mbombolokele koondoolopa ndhoka oonene. Naantu oyendji oye shi tala ko kutya osho ashike shi na okukala ngaaka. Ashike ondoolopa yaNgwediva oye shi ulika kutya dhika odhanakalindi, oshoka oya longitha omukalo omwaanawa gokuthitikinina mo aakalimo yaamoka mondoolopa. Elelo lyondoolopa yaNgwediva otali tayima niiputudhilo ngaashi oUNAM, yo natango oya tula po oopolohalama tadhi hili aanyasha yi igwedhele ko kuunongo mboka ye na, haye shi ningile mendiki lyaayehe mondoolopa yawo moka. Shika oshinima sha pumbwa olutapo komalelo goondoolopa dhilwe, opo oondoolopa adhihe dhi kale dhi na omangenete gokuhila aantu ye na omaunongo noontseyo dha yooloka, uunene tuu aanyasha. Shike otashi ka tidha po wo omukundu gwaanyasha taya tondokele koondoolopa dhimwe, hoka haya ka thinaneka natango onkalo koondoolopa hoka, yo taya ki iyadha ishewe taya kondjele okashona hoka ke li po kombinga yiilonga.

LEAVE A REPLY

Please enter your comment!
Please enter your name here