Oshiluku oshitine shokafeelema Sigo Uunake sha pitithwa

0
192

Pinehas Nakaziko

Ovenduka-Aanyandi yatatu haya dhana iinyandwa yawo mOshiwambo yongundu MKW, osho ya holola egaluko lyawo mehangano lyiinyandwa, sho ya li ya tseyitha nokupititha oshitopolwa oshitine shookafeelema kawo okapeepeka, Sigo Uunake.
Okafeelema haka okwa li ka piti Etine lya zi ko, sho aanyandi ya li ya ningi uule woomvula mbali ya tya po thilu, mwolwa omatompelo gayoolokathana.

MKW edhina ndyoka lya fupupikwa, nolya tulwa kumwe mwola aanyandi mboka yatatu yomadhina ngaashi taga landula; Mwiipondje, Kapandu naWulipeni (MKW).

Omupopiliko gwongundu yaanyandi mbaka, noku li oye ishewe e li omunyandi omunene, Mwiipondje, okwa ti yo ayehe yatatu oya tamekele nuunyandwa mbuka uushona mo1996, momukunda Epoko, mOmbalantu, moshikandjohogololo shaKalongo.

Ohokwe yawo miinyandwa oya li ya landula pethimbo ya li haya hiti enongelo lyawo pEpoko Combined School, moka ya kala nokudhana iinyandwa yomOshiwambo, yomaludhi ga yoolokathana, pethimbo lyootundi dhOshindonga.

Mo2012 aanyandi mbaka oya li ya tokola opo ya humithe oshitalenti shawo pombanda, noya uvathana opo ya thaneke okaviidio kawo kotango kaSigo Uunake, oshitopolwa shotango, hoka ka li ka taambiwa ko nawa koshigwana, molwa iiyolitha mbyoka yi li mo notayi mbekula noonkondo.

Pokati koomvula dhoka sigo omo 2015, aanyandi oya kala ya tula ombunda moshihwa nokuthaneka uuvidio wawo owundji, mboka wumwepo wa kala noku ulikwa komapandja goIntaneta, ngaashi YouTube osho wo Facebook, nowa kala nokuyolitha oyendji.

Mwiipondje okwa ti okafeelema kawo Sigo Uunake otaka popi kombinga yomathimbo gwoshinanena, nomashongo ngoka ga taalela aanyasha yopaife, unene tuu aagundjuka mboka ihaa ya shuna komagumbo gawo hoka ya za, noye li ya ninga oombwiti muushimba.
Okafeelema haka oke li nale taka fandithwa nawa unene tuu miitopolwa oyindji mbyoka yomonooli yoshilongo.

“Otwa galuka tu na omukumo noonkondo, notwa tokola twa mana mo opo tu ka kale twa thaneka uufelema owundji mboka tau hokitha nuumvo,” Mwiipondje ta ti ngaaka, ta gwedha po ishewe ta ti oya hala okuhanagula po onkalo yoluhepo, tashi pitile miinyandwa yawo.
Aanyandi mbaka oya hala oku ka tsa uukuni kumwe naanyandi aanene moshilongo, shampa ashike pu na ekwatathano lyi li nawa. “Okulonga naantu kashi shi naana oshinima oshipu, oshoka ohapu kala pu na omananatho omawinayi, niinima mbika ohayi ka eta etopoko, Mwiipondje ta popi ngaaka.

Ngashingeyi oye li haya longo nokuthaneka oofeelema dhawo oyo ayeke, moka ye li haya kwathelwa kehangano lyoKappa Film Production.

LEAVE A REPLY

Please enter your comment!
Please enter your name here