Namibia ota ti shilindi manga kiikwanyama yimwepo ku keelelwe omukithi gwoListeriosis

0
180

Loide Jason

OVENDUKA-Onyama yiikwamuhaka ayihe mbyoka hayi zi koSouth Africa itayi pitikilwa mo we manga moNamibia omolwa omukithi gwoListeriosis, ngoka gwa fala aantu oyendji konakupila moSouth Africa, nogwa tula omuntu gumwe moshipangelo moNamibia oshiwike shika.

Uuministeli wUunamapya nUunimuna, Omeya nUushitwe owa gandja elondodho mEtitatu lyoshiwike shika kutya poongamba dhaNamibia itapu ka pita we manga iikwamuhaka, noonyama ndhoka dha telekwa nale, ngaashi eepoloni, eelashena, nuuviena.
Omukithi gwoListeria ogwa dhipaga aantu ya adha po-200, omanga aantu ye li 970 otaya ehama puushiinda moSouth Africa.
MoNamibia omulumentu gwepipi lyopokati oku li ngashingeyi ta kondjo nomwenyo sho a monika omukithi ngoka gwa zilila miikwanyama mbyoka ya tumbulwa pombanda .

Bernard Haufiku, ngoka e li ominista yuundjolowele moNamibia, okwa li wo a lombwele egumbo lyomutumba gopashigwana kutya ngoka a ningwa oshihakanwa shika omulumentu goomvula 41, ngoka e li moshipangelo mOvenduka. Haufiku ta ti ishewe omulumentu nguka okwa li a li omuhaka ngoka a li a landa poshilahite shimwe mOshomeya, nokwa itaalwa kutya omo mwa zi omukithi nguka. “Otwa kala nale twa lukila uutati wetu sho tu uvu kutya South Africa oku li moshikumungu shika,” minista ta popi ngaaka.

“Iinima ayihe mbyoka tayi landula mpaka oya indikwa oku etwa moNamibia. Iikwamuhaka ayihe koonono mbyoka hayi longwa komahangano ngaashi Enterprises Renown, Bokkie, Mielikip noLifestyle ndjoka ya longwa koEnterprise Polokwane (ZA33) noshowo Enterprise Food Germination,” osho Uuministeli wUunamapya nUuniimuna wa ti.

Ombapila ya pitithwa kuuministeli mboka oya ti kutya iikwamuhaka mbyoka ya longwa nokulongekidhwa omanga omasiku gane gaMaalitsa inaga thika inayi kwatelwa mo moshikonga shika.

Omukanda otagu ti kutya aniwa omusindalandu gu na sha nuuyogoki nosho wo uundjowele otagu ka tulwa miilonga , opo a kale a sa oshisho shokukala a mona kutya iikwanyama ayihe mbyoka tayi tulwa moondooha oya shomononwa noya tulwa pombepo yi li nawa, na kaina shoka tashi vulu oku etitha omukithi ngoka gwa tumbulwa pombanda.

“Nashi kale sha kuthwa ko kutya South Africa okwa ti shilindi manga koonyama dha kweywa okuzilila komahangano ngoka ga tumbulwa pombanda ngoka haga kweya oonyama dhoka, sigo oompoka taku ka monika kutya iikwanyama mbyoka itayi vulu we okutaandelitha omukithi ngoka,” osho omushangwa gwa hokolola.

Oshikondo shoka hashi ungaunga nuundjolowele wiikulya muuministeli wUundjolowele nasho woo otashi tula miilonga okukala taya lolo kutya iilandithomwa mbyoka otayi vulu oku etitha uuvu mboka nenge aawe.
“ Uuzigo mboka womiikulya ohawu ya uuna omuntu a lya iikulya yi na ombakitelia yedhina Listeria. Ano omukithi nguka ogu li unene gwa nika oshiponga koomeme ye li momategelelo, aanona aashona, aakulupe naantu yalwe mboka ye na aakwiita yolutu ya nkundipala,” osho omushangwa gwa fatulula.

Omandhindhiliko ngoka ongaashi epyupyu, oontumba tadhi tapata, oshimela, omutse tagu pwatuka, othingo ya kukuta, engwangwano , ekanitho lyoonkondo nosho wo ekakamo lyolutu lyapitilila.
Omunyolwahapu ngoka ogwa hokolola kutya uuvu mbuka otawu vulu okukeelelwa ngele aantu taya kwata nawa iikulya yawo nosho wo okudhiginina uuyogoki ngaashi naana oku iyoga koonyala konima yokulongitha okandjugo.

LEAVE A REPLY

Please enter your comment!
Please enter your name here