Elelondoolopa lyaNgwediva olyi itula mo omutse nothingo okuyambidhidha ehumokomeho

0
46

Omutoolinkundana gwaKundana, Loide Jason, nomupopiliko gwelelo lyondoolopa yaNgwediva, Jackson Muma oya li yi inika komilungu kombinga yoonkambadhala ndhoka tadhi ningwa keelelo lyondoolopa ndjika moku eta po oompito dhiilonga, osho wo okuhumitha komeho aagundjuka mondoolopa yaNgwediva nopomidhingoloko dhopopepi.

Oonkundathana dhawo odha li ngeyi:
Loide Jason: Oonkambadhala dhini mwa tula pehala opo mu kwashilipaleke kutya aakalimo yomondoolopa otaya mono uunongo wi ihwa po opo ya vule okunduluka po oompito dhoku ilongela yoyene?

Jackson Muma: Ondoolopa yetu egumbo lyoosikolaa omi-22, dhimwe odhopaumwene nadhimwe odhepangelo. Yo ondoolopa yetu otayi adhima ishewe niiputudhilo yelongo lyanakupwe, ngaashi oUNAM, NUST noIUM nayilwe wo.

Liode Jason: Tu kuthila ko kudhimwe dhomoopolohalama ndhoka wu wete dhe shi pondola, nodha kwathela ngiini okunkondopaleka aanyasha?
Jackson Muma: Elelondoolopa lyaNgwediva olya tota po endiki lyomainyanyudho tali kwathele oshitopolwa shopankalathano hali ithanwa Sam Nujoma Multi Purpose. Oopolohalama dha nuninwa aagundjuka omo hadhi tokelwa noku uhala mendiki muka. Uunona woothigwa nawulwe mboka wa gumwa konkalo ya yaga kegonga ohau kwathelwa nokuzulwa okuza poomvula dhopetameko, shika otashi kwathele opo ya ka kale aantu ye na ongushu moshigwana monakuyiwa. Otu na wo Ongwediva Junior Council, moka aanasikola yomondoolopa yaNgewdiva haya dheulilwa iinakugwanithwa oyindji, mwa kwatelwa iinima yi na sha nonkalonawa yoshigwana. Ohatu ningi wo omapingakanitho moka aanyasha yetu haya pewa ompito ya paathane uunongo nomayele naanyasha yokiilongo yilwe, ngaashi Belgium.

Loide Jason: Elelendoolopa lyeni olya ningi po shike opo li ete po oompito dhiilonga?
Jackson Muma: Omalelo agehe oge na oshinakugwanitwha shokuyambula po eliko lyomoshikandjo shoka, onkene elelo otali umbu lya nana ngele tashi ya kokuyambula po nokunduluka po omikalo dha yooloka ndhoka tadhi yambulapo eliko nemona moshitopolwa, shoka tashi tu eta sigo omompito yokupatulula oompito dhiilonga. Elelo olya gandja nale evi, notali tshikile okugandja iimpungu yomavi komahangano ga yooloka, shoka tashi dhana onkandangala moku eta po oompito dhiilonga. Ompanga iilonga yimwe ngaashi okutoola iiyagaya mondoolopa ohayi gandjwa kaanangeshefa yopetameko opo ya nkondopeke oongeshefa dhawo.

Loide Jason: Omashongo geni ge mu taalela moku andjagakaneka oopolohalama dheni pashikandjo nosho wo pashitopolwa, nelelo otali kandula po omashongo ngano nomikalo dhini?

Jackson Muma: Elelo olye ya po noondungethaneko odhindji moka tali dhimbulula oompito, dhoka dha nuninwa okukandulapo omashongo ngoka. Onkene itashi kwatha okupopya unene kombinga yomashongo, oshoka ope na omikalo dhimwe tatu vulu okulongitha. Ashike ndhindhilika kutya omashongo opo ge na okukala aluhe, ashike opo tu ye ponkatu ya landula ko, otwa pumbwa oondungethaneko ndhoka tadhi sindi omashongo goludhi kehe.

Loide Jason: Okwa ndhindhilikwa aanyasha oyendji ye na uunongo noontseyo dhongushu taya mbombolokele kOvenduka nokoondoolopa dhilwe dhi li komakule, mbela shino itashi mu thigi pomutenya oshoka aanyasha mbaka oyo taya yambulapo eliko lopashitopolwa?
Jackson Muma: Okumbombolokela koondoolopa okuza kuushayi oshinima shi li uuyuni auhe, moka aantu taya kongo oompito dhuuhupilo oohwepo oshoka oku niwe eitaalo kutya oondoolopa odha huma komeho. Ongwediva nayo oya nana notayi tsikile nokunana aantu yomaunongo noontseyo dha yooloka. Aantu mbaka otaya dhana onkandangala mokuyambulapo eliko lyetu moshitopolwa.
Loide Jason: Aanangeshefa mboka ya hala okuya mondoolopa yeni ohamu ya hili nokashona kashike opo ya ninge oonkondo?
Jackson Muma: Okashona ketu oki ikwatelela kongeshefa ndjoka omuntu a hala oku eta mo, na kehe edhilaadhilo lyongeshfa otali tulwa koshidhinditho shalyo yene.

Loide Jason: Okuyelekanitha noondoolopa oonkwawo, uuwanawa washike u li mOngwediva, nelelo otali longitha omukalo guni opo li itule pondondo yokunana omangeshefelo ngoka ge na oonkondo moku eta oompito dhiilonga?

Jackson Muma: Kehe elelondoolopa oli na omikalo dhawo dha sheywa.
Ashike nando ongawo omalelo agehe otaga longo momidhingoloko dha faathana, noge na elalakano limwe. Shika otashi thinaneke ompito yomathigathanopo.

Onkene elelondoolopa lyaNgwediva otali longo neitulemo opo li ete omayakulo taga thononoka nawa koshigwna.
Shoka tatu ningi otashi kwathele wo oondoolopa dhimle uuna tatu ungaunga noshinakugwanithwa shetu.

LEAVE A REPLY

Please enter your comment!
Please enter your name here