Iindji a pula aalongwa ya simaneke oshilongwa shuunangeshefa

0
56

Maria Namupala

OLUKONDA-Omunashipundi gwehangano lyaanangeshefa monooli yoshilongo Tomas Iindji okwa indile aanaskola ya simaneke nokwiitula moshilongwa shuunangeshefa. Eindilo ndika Indji okwe li ningi Etitano manga ta popitha posikola pOlukonda.
Indji okwa yelitha kutya oshilongwa shuunangesfa osha simana mehumokomeho neyambulepo lyoshilongo, “Oshilongo shaa na oongeshefa otashi si po nokashi na mpoka tashi yi, onda hala okukumika aalongwa ya simaneke oshilongwa shoka molwaashoka mokati keni omo mu na aanangeshefa yoondondo dha yooloka, kaleni mu shi kutya oshilongwa shoka osha simana unene nonkene shi simanekeni nokwiitula mo musho,” ta ti ngaaka.

Ta ti omangeshefelo ogo oindjina yeliko lyoshilongo nongele kamu
na uunangeshefa nena neliko otali kala lya kuutumba no itali inyenge sho oshilongo tashi dhiniwa kiilongo iikwawo. Tati oshilongwa otashi kwatha aalongwa ya tseye esimano lyasho notashi ya kwathele ya tseye nkene yena okutotapo oongeshefa dhawo uuna ya mana omailongo gawo.

Okwa gandja oshiholelwa shomundohotola Aupa Indongo ngoka a tameka okulanditha uuleke ashike pethimbo ndika oku li omukwateli komeho goongeshefa oonene nodha yooloka moshilongo, nokwa totapo oompito dhiilonga odhindji.

Indji ta gwedha po kutya oshilongwa shika otashi longo woo aanona oshindji unene ngaashi okukwata nawa iimaliwa yawo, nonkene ye na oku yi pungula uuna a likola. Ta ti oosikola odhindji otadhi wilikwa onga omahangano, unene ngele tashiya kiiyemo.
‘‘Ohashi kala oshinima oshiwanawa uuna aanona taya longwa manga ye li mepipi eshona ngaashi oshilongwa shika shuunangeshefa otashi ya kwathele koomvula dhokomeho nokupatulula uuluyi wawo ya mone kutya nani eliko lyoshilongo ohali yambulwapo uuna omuntu gontumba e na ontseyo muunangeshefa ’’, ta ti ngaaka.

Okwa indile aalongwa ya kale ye shi kutya monkalamwenyo otamu pumbwa omuntu e shi shoka ta lalakanene, yo uuna ya landula iilongwa mbyoka otashi ya kwatha konakuyiwa ya tote po oongeshefa momidhingoloko dhawo nokugandja iilonga kwaamboka yeyi pumbwa.
Iindji ta tsikile ko ta pula aalongi naavali ya tse aanona omukumo ethimbo kehe, yo ya longwe esimano lyuunangeshefa momagumbo osho wo koosikola, yo ya kale ye shi kutya oshilongwa shoka osha dhigininwa moosikola naalongwa ya kale ya pashuka ethimbo alihe.
Okwa halele aalongwa omukumo ya dhiginine iilongwa yawo molwaashoka oyo aaleli yokomongula noye na oshindji okulonga, ta ti onkalamwenyo oyi li momake gawo yo inaya hepitha ompito kehe taya mono.

LEAVE A REPLY

Please enter your comment!
Please enter your name here