Khuse naFoxy yu ulika kutya iiputudhilo yomaudhano oyi na oshilonga

0
55

Shipi Elago

Oshakati-Esimano lyokuzula aadhani manga aashona oli li tali hololwa kiizemo yoosipana mbali dhomoliha yaShana ndhoka dha li dha totwa po onga iiputudhilo yokudheula uumati uushona okutameka pomimvo 13 sigo 17.

Uumati mboka wa li hawu dhana miiputudhilo yoosipana dhika wa li wa koko oya li ya tameke noku wu landitha koosipana dhoka hadhi dhana moliha ashike sho omwaalu gwa tana iiputudhilo mbika shaKhuse Academy naFoxy Academy oya li ya tokola opo yi ishangithe moliha nokutota po oosipana ndhoka dha li dha tamekele koliha yaMaalala nongashiingeyi ohadhi dhana moliha yoSecond Division yaShana.
Ehuliloshiwike lya za ko Khuse naFoxy oya li ya holola nkene shi li sha simana okutameka okudheula uunona uushona etanga okuza pomimvo dhopetameko, konima sho dha li dha dhenge mo omakuwa omanene mOshakati nokuya kedhingoloko lya hugunina, oshinima shoka sha kala sha pumba mondjokonona yokatanga kokoompadhi monooli, oshoka oosipana dhoka oonene ohadhi sindi alundji oosipana oonshona ihe mpaka ondjokonona oya lundululwa thiluthilu.

Khuse FC okwa li oshiputudhilo shaNakusa Khuse Malakia ngoka oye a li a toto po oshiputudhilo shika nokuputudha oshipandi shaamati mboka ngashiingeyi ye li taya hempulula iilonga ye nando ye mwene ke po we.

Foxy Senior FC osipana yaShiindi Fillemon ndjoka nayo wo ya li ya zi momutanda ngoka gwa li gwa zulwa okuza moshiputudhilo shokudheula uumatyona uushona, nayo oyi li ya landula moongaku dhaKhuse FC oku ulukila oosipana oonene komutse gwondjamba.
Shika oshi li oshikando oshitiyali oosipana dhika mbali tadhi pupula oosipana oonene mOshana mekopi lyoDebmarine konima sho ya li ye shi ningi omvula ya za ko moka Khuse a li a sindi mukwawo nookoola 2-0.

Oosoondaha ya za ko oosipana ndhika odha li dhi ikwata natango medhingoloko lya hugunina lyuudhano woDebmarine womOshana konima natango sho dha li dha tyakaleke oosipana dhomadhina omanene.

Khuse FC okwa li e ya muudhano mbuka e na okwaako ku li pombanda unene tuu sho a li momufolomo omwaanawa moliha moka a kuutumba a tula okugulu kokukwawo pehala etiyali na oku li Golden Bigs mokashokwi.
Khuse okwa li a pitile mukwawo nokoola yosheendelela okupitila kompadhi yokamati Peter Hailombe hoka haka zala onomala onti-11 muule ashike wominute ntano dhopetameko .

Khuse okwa li es hi uudhano pokati kawo naFoxy otawu kala ashike okambi mehuli, ashike shika inashi ningwa oshoka Foxy okwa li naye a kwata pevi na shoka okwa li e ya a manga a pama nokwa li a hala okukwata iikonene yomvula ya za ko sho a li a sithwa ohoni komeho gaayambidhidhi ye nookoola mbali dhomoshikangwa.

Khuse okwa li ta keelele noombati nando eyalulo lya li 1-0 pokafudho, Foxy okwa li a thikile ta pukululwa mokoola nokwa li nokuli a tula mo etanga okuzilila kompadhi yokamati Amukoto Fillemon noku eta engwangwano mokati kaKhuse ngoka a li e wete kutya okwa li e na oshikaha shimwe kondjambi yahugunina.

Khuse okwa li e na okulonga a tula ombunda moshihwa naashika osha li she mu zile okoola ndjoka ya li ye mu pe esindano noku dhenga mo Foxy mekopi ndika oshikando oshitiyali.
Ngashiingeyi Khuse oku li a tegelela kutya ota ka pewa omukondjithi guni medhingoloko lyoosipana 32 moshilongo ashihe.

LEAVE A REPLY

Please enter your comment!
Please enter your name here