Okuyaminina epangelo naku thelwe okalambo

0
36

Dhengwa u lungame tuu shili. Oomvula mbali dha ka dhilongela odha longa Namibia oshilongwa oshinene, oonzo dhopaushitwe moNamibia evi to yele, nonande oshilongo shetu oshi li tashi fuluka nuuyamba woohi, oshingoli, oUranium, okawe noonzo odhindjidhindji, omukalo ngoka tatu longitha emona lyoshilongo ogwo tagu wilike kutya oshilongo shetu otashi kala monkalo yeliko li li pamuthika guni. Momumvo gwa piti, eliko lyetu olya dhengwa ombunda pevi. Oongeshefa odhindji odha li dha pata, naantu oyendji oya li ya kuthwa miilonga. Noongeshefa ndhoka oonshona otadhi ulike kutya odha gumwa nadho koshikumungu shika, nodhindji otadhi ku kuthile ko lela nkene aayambidhidhi mboka ya kala noku ya sapota ya pwiinine po.

Uuna eliko tali ende tali shongola muuyuni, nena osha hala kutya kape na naangoka ta landa oonzo dhetu dhopaushitwe. Oluteni nalo wo olwe tu umbile monkalo ombwiinayi. Ashike ngele otatu popi dhoshili, aaNamibia natu iyaleni ombedhi oshoka ohatu longitheni iimaliwa yoshilongo shetweni nayi. Osha simana tu ndungikathaneni kombinga yoshinima shika. Omanga aaniloonga oyendji mepangelo taya longitha oshimaliwa shepangelo nayi, aanangeshefa wo kombinga onkwawo otaya li oshimaliwa shepangelo oshimwene kee po, moka haya tula oondando dhawo mokalemo uuna taya ningi oongeshefa nepangelo.

Ope na aantu yongandi nomagumbo gontumba ngoka ga pumbwa okuyambidhidhwa kepangelo. Omashongo ngaashi omuloka gwa nkundipala , osho wo aantu yamwe taya ehama itaya vulu okulonga omolwa omauwehame odho oompito dhimwepo moka epangelo lya pumbwa okukwata aantu mboka keti. Ashike eyambidhidho nali tulwe koshidhindhitho, ngaashi naana ominwe dhetu dhokoonyalakadhi kaadhi thike pamwe, hamagumbo agehe taga pumbwa eyambidhidho li thike pamwe. Omagumbo gamwe oga pumbwa ashike okukwathwa kashona opo ga vule oku ikwatha gogene, omanga gamwe ga pumbwa lela eyambidhidho lyiikulya.

Nonando ongawo, oto ndhindhilike kutya ope na aantu yamwe taya mono uuwanawa woshikukuta nonando oye na mo oshindji miigandhi yawo. Mboka inaya pumbwa ombuto oto adha wo taye yi pewa. Hapo ashike sha hulila mpoka, natango oto itsu mboka ye na oshimaliwa shokufuta omambakumbaku gawo yene taya kondjitha ya pululilwe kepangelo, yo taya hakana po nduno ompito dhaamboka ya li ye dhi nuninwa. Iiholelwa yaantu taya yaminine epangelo ito yi mana. Kombinga hwiya oku na ngaa mba taya futwa ondjambi yaalongisikola yo ihaaya thikama komeho gaalongwa, po pe na ishewe mboka haya longo oluteyima oshiningilawina (ano ethimbo lya gwedhwa po) opo ya vule okufutwa ondjambi ndjoka hayi gandjwa uuna to longo pamukalo ngoka.

Iinima mbyoka ya tumbulwa pombanda mpaka, nayimwe inaayi tumbulwa oyo lela tayi thipi eliko lyoshilongo shetu ombinzi. Pethimbo a li ta gandja omutengenekwathaneko gwelongitho lyoshimaliwa momutumba gwopashigwana oshiwike sha piti, oMinista yemona lyoshilongo, Calle Schlettwein, okwa koleka kutya epangelo otali ka kandula po omikundu dholudhi nduka. Nepangelo otali ka kwashilipaleka kutya iimaliwa itayi ka longithwa we nuuhasha.

LEAVE A REPLY

Please enter your comment!
Please enter your name here