Omukuluntu ohungi; Aakondjelimanguluko otaya ka tameka okuhungila

0
67

Loide Jason

Ovenduka-Omugandjimayele gwopambepo goonakulwa aakulu Tshapaka tshaKapolo okwa ti oonakulwa aakulu otaya tameke okukala ye na oohungi moka taya ka hokolola omahokololo gawo gomiita.

Shika Kapolo okwe shi popi sho a yi moonkundathana naKundana ongula yOmaandaha gwoshiwike shika mOvenduka.
Okwa ti shika otashi tameke nziya oshoka oya tala kutya shika oshi li omukalo omupu ngoka tagu kalitha oonakulwa aakulu ye li hwepo ngele tashi ya pamadhilaadhilo molwashoka oya lya iipyu niitalalaya pethimbo lyekondjelomanguluko.

Shaashi edhina lyombwa okumukweni ho li uvu, okwa ti ondungedhilaadhilo ndjika olye ya po sho ya li ya yi moonkundathana nuuministeli woonakulwa aakulu wokoFinland omumvo gwo-2015.

“Otwa li twa ka pula ooyakwetu mboka ye na uuministeli tawu ungaunga noonakulwa aakulu nkene taye shi pondola okukala ya longa nawa niilyo mbyoka, noya li ya ti kutya enenedhilaadhilo lyokukala ya pondola sha ngele taya ungaunga noonakulwa aakulu olyo ku ya gongaleka e taya pewa ompito yokutya ko sha ngele tashi ya kwaashoka sha ningwa po mekondjelomanguluko,” osho Kapolo a hokola ngaaka.

Okwa ti oya tameka nale nokuli nomalongekidho okuya kaantu yawo mboka opo ya wape okukala ya gwanitha po shoka ya hala okuninga .
“Ngashingeyi otu li twaiipyakidhila nomalongekidho gwokuyambeka nokuyambula po ombila yomukondjelimanguluko Johannes Kandjamba ndjoka yi li kOnangalo koshikandjohogololo shEpembe moshitopolwa shaHangwena, onkee otu na oku enda opo tu unganeke oohungi dhaakondjelimanguluko,” osho Kapolo a hokolola ngaaka.

Okwa ti kutya oohungi ndhika otadhi ka kwathela aantu mbaka opo ya vule okutopolelathan aonakuziwa yawo yomekondjelomanguluko nosho wo okudhimbwa omahepeko gwopamadhilaadhilo ngoka ya kala noku kala ye na sho ya li miita.

Ta popi naKundana woo okwa li omupresitende gwehangano lyoonakulwa aakulu Ben Shikongo, okwa ti ngashingeyi sho nduno ya mona omagano gwothaila ndjoka ya gandjwa kaaSuomi otayi ka kwathela okugondjwa kwaamboka ye yi nuninwa.
Okwa hokolola woo kutya ngashingeyi oye na olweendondunge ndoka talu ka kwathela oku ka pulakena komadhilaadhilo ga yooloka goonakulwa mboka.

“Otu shi shi kutya ope na oonakulwa aakulu ye li po taya monithwa iihuna kaapambele yawo, onkee shika otashi ka hula po ngele twa tameke okuya muule woshinima shika,” osho Shikongo a hokolola ngaaka.

Okwa popi kutya mboka ngashingeyi ye li taya monitha oonakulwa aakulu iihuna otaya ka tsuwa iilyaalyaka e taya pingenwa po kwaamboka ya inekelwa komazimo okusila oshimpwiyu oonakulwa aakulu unene tuu mboka taya yambidhidhwa.

“ Aantu yetu mboka ya monithwa nayi iihuna pamadhilaadhilo kiita naamboka ya lemanena miita oye li ngashingeyi taya hepekwa kwaamboka haya kala nayo noniimaliwa yawo. Ashike shika otashi ka mona ehulilo. Oshoka itashi vulika omuntu ta mono iimaliwa ye kepangelo ihe mpoka ta lala kape shi okutalwa ,omanga iimaliwa ye tayi ningwa po oondaanisa kwaamboka haye yi kwata,” osho a ti ngaaka.

Okwa ti ngashingeyi ehangano ndika oli li lya ipyakidhila nondunge dhilaadhilo nkene taya ka longa opo mbyoka yi ka kale itayi holoka we.

LEAVE A REPLY

Please enter your comment!
Please enter your name here