Oonguwo dhothaathaa dha ndulukwa moshilongo otadhi ka ulikwa poDubai

0
121

Pinehas Nakaziko

OVENDUKA-Omutotipo gwehangano lyoonguwo ndhoka dha ndulukwa nokunyanyangidhwa moshilongo “Onapo Clothing” gwedhina Jeremia Tuhafeni Hauwanga, noku li a tseyika nawa onga Jeremy, ota ka tseyitha ishewe iizalomwa ye itatu yi li kohi yehangano ndika lyedhina “Onapo Clothing”, tashi ka ningilwa pehala lyomainyanyudho poDubai Lounge mOkatutura Olyomakaya ndjika.
Iizalomwa mbika tayi ka ulikwa poDubai na oyi li ya ningwa pamukalo gwoshiNamibia lela ongaashi ‘Onapo ya Pitilila’, na ‘Enota la nya’. Otayi ka kala yi li moludhi luumbindja uushona wokolutu, oombulukweya, oombulukweya oofupi, niizalomwa ya yoolokathana yokolutu.

Jeremy okwa ti ye okwa li a tsu uukuni kumwe naTeophilus Pombili Mwaningange, hi ithanwa Omp, opo ya ete po omizalo ndhika, tadhi tseyitha noku ulika omuthigululwakalo gwomoshilongo, nodhi na omatumwalaka taga popi sha, notaga tungu.
Jeremy okwa li a tameke oku eta po iizalomwa mbika oomvula dha piti, sho a li a tameke manga “naMonkey See, Monkey Doo” etumwalaka ndyoka lya li tali popi kombinga yokuholelathana. “Konima yomuzalo nguka, ngame nakuume kandje, otwa li twa kambadhala opo tu ete po ishewe omaludhi ogendji gwomizalo ngoka ga shangwa mOshiwambo,” Jeremy ta ti ngaaka.

Okwa gwedha po ta ti shika osho ihe sha vala po ehangano ndyoka lyo “Onapo Clothing”, nonando edhina olya li lya holokele po owala onga uumbindja mboka ya li ya ningi. “Onapo petameko okwa li owala okutya ino endelela ngoye ino enda kashona, shampa ashike to ningi iinima yoye nethimbo,” Jeremy ta ti ngaaka.

Jeremy okwa popi ishewe ta ti sho ya kala mehangano ndika uule wethimbo ele, oya li ya hala ya kuthe onkatu ya yoolokathana, noku eta po ihe omaludhi ngaka giizalomwa ya yoolokathana, noge li ga nuninwa unene aapopi yelaka lyOshiwambo.”
“Edhina limwe lyomiizalomwa ngaashi Enota la Nya itashi tukana, ashike okutya ashike tidha po enota, unene mboka ye hole omamakito, nokunwa mo mokatutu.

Omanga Mom I Made It, Jeremy okwa ti shika okupopya ashike kombinga yaantu ayehe mboka ya pondola sha monkalamwenyo. “Shika natango okugandja ashike olupandu koomeme yetu sho ya kala noku tu sila oshimpwiyu sigo twa adha ondjila ndjoka yesindano.”
Omvula ndjika otaya ka longa nuudhiginini noku eta po iizalomwa ishewe ya yoolokathana mbyoka yi na etumwalaka tali tungu. Olyomakaya ndjika, etseyitho lyiizalomwa mbika otali ka tameka pohamano yokomatango, nomeni otamu ka yiwa oshali.

LEAVE A REPLY

Please enter your comment!
Please enter your name here