Ricardo te ke tu pa mo mokambundju ke koongalo konima sho a li a mono etando

0
58

Jeremiah Ndjoze

OVENDUKA-Omuhikingalo Ricardo Shaningua, a tseyika nawa nedhina Ricardo, okwa li a haluka noonkondo, sho a li a lombwelwa kutya otashi vulika a kale e na okaankela. Ashike sho a ka lombwelwa dhothaathaa kutya dhika odhanakalindi, okwa mono ishewe oonkondo, omukumo nomatokolo opo a galukile oshitalenti she shokuhika oongalo.

Omasiku ga zi ko, Ricardo okwa li a taambelwa moshipangelo shopaumwene mOngwediva moka a li a tandwa mokakola hoka haka zi omayeye moka oondohotola dha li dha luka omu na okaankela.

Komapekaapeko ngoka ge li komalungula otaga fatulula kutya uumanya wontumba, owo olundji hawu etitha okakola komayeye ka zinde nenge ka fulakate. Shika ohashi holoka uuna uumanya mboka tau keelele opo omayeye kaaga kunguluke ngaashi osho shi na okukala. Uuna omayeye taga pitile kokamunino, ohaga igongele mokakola hoka , shoka tashi etitha okakola ka zinde ko taka tapata.

Ashike aayambididhi oyendji yaRicardo oya li ya haluka nokuholola euvo lwawo lyonayi, moka oyendji ya li taya ti nokuli omuhikingalo nguka okwa yahwa iikando yi li ine. Ashike omuhikingalo nguka e li monkalo tayi nuwa omeya mOshakati, ota ti evundakano ndika olya etwa sho a li a shanga komalungula iitya tayi limbilike ya za mokangalo kaTupac. Ta ti okwa shanga kutya oohole ne odhe mu thiga othika, ashike ota tis hike okwe shi longitha ongeyelekanitho netando ndyoka lya enda moonkatu dhi li ine.

Ta popi wo kutya okwa kala monkalo ondhigu sho oondohotola dha li dhe mu lombwele kutya otashi vulika a kale e na okaankela.
“Uumbanda mbuka itau popiwa nokuli. Onda tameke tandi ipula kombinga yonkalonawa yanekulu lyandje nuunona wandje, onga omuvali ethimbo lyokudhilaadhila megulu nomoheli onda li nde li kotha mo thilu. Oto dhiladhila ashike aaholike yoye.’’ Osho a ti.
Okwa li a pepelelwa sho onkundana tayi nyanyudha ya yi momakutsi ge kutya nani ke na okaankela.

Ashike ngashingeyi, omuhikingalo nguka golutu lwa ngwama nawa ota popi kutya oku na ohokwe yokutameka ishewe okuhika oongalo noku imbila ko nekulu gwe uungalo tau hokitha. Ota ti shika kasha shi naanaa oshinima oshidhigu oshoka okwa kala noku imba piituthi yoohango, sho osho wu wete a fa a kana mo kashona. Ta popi kutya osho ashike oshinima a li ta vulu okulonga pethimbo ndyoka oshoka okwa li a hala okugandja ohole kuunona we osho wo kuefolo lye, ye ti itula mo wo miilonga ye moka e li ha longo ongomugandjimayele momangeshefelo gontumba mondoolopa yi li monooli yoshilongo.

Ota ka pititha wo oalbuma ompe, yedhina ‘FreeCardo’, ndjoka ta ti okwa ekelahi nale oku yi mbyangaambyanga nokwa tegelela ashike a galukile monkalo ye yuukolele e tu pe mo mokambundju ke.

LEAVE A REPLY

Please enter your comment!
Please enter your name here