“Uufuuli wa tsa kesipa oshinakugwanithwa sha kehe gumwe,” Shifeta ta ti

0
55

Maria Namupala

OLUKONDA-Minista yomidhingoloko nomatalelopo Pohamba Shifeta okwa kunkilile aakwashigwana ya kaleke omidhingoloko dhawo dha yela, ndhika okwe dhi popi Etitano pethimbo ta popitha aakwashigwana, aalongi naalongwa ya za moshikandjolongo Onathinge pOlukonda moshitopolwa shaShikoto.

Pohamba okwa holola okuuva nayi kwe onga e li minista yomidhingoloko nomatalelopo, ta ti otashi yemateke okutala omidhingoloko koombinga noombinga dhi li monkalo ombwiinayi, unene ekako ndyoka tali monika pomahala nomahala.

Okwa pula aakwashigwana ya hulithe po omukalo gokuumbila iiyagaya shaa mpoka, yo ya kwashilipaleke aluhe kutya omidhingoloko dhawo odhi li muuyogoki nodha yela opo ku kondjithwe ondoya nekako moshilongo.

“Onda talela po omahala ogendji moshilongo, ashike otaga sitha omuntu ohoni molwaashoka aantu ohaya umbile noku ekelahi iiyagaya shaa mpoka nonande pwa totwa oompango tadhi kunkilile aakwashigwana ya hulithe po omikalo dhokunyateka omidhingoloko kehe,” Shifeta ta ti.

Ta gwedha po kutya omidhingoloko ihadhi kakekwa owala ngele taku ekelwahi iiyagaya, ashike nokufika iinima tayi zi olwithi lu uka mewangandjo, okuteta po omiti ndhoka hadhi eta ombepo nayilwe woo oyindji mbyoka hayi kakeke nokuluudhika omahala.
Minista ta ti omolwonkalo ndjika uuministeli pamwe nombelewa yomupelesidente omundohotola Hage Geingob, oya thaneka yi ka tule oshikonga shoku opaleka miilonga kuyele nuumvo, opo aaNamibia ayehe koombinga noombinga ya tameke okwoopaleka omidhingoloko dhawo noku dhi kaleka dha yela, opo woo dhi vule okunana aatalelipo ya za meni nopondje yoshilongo.

“Iikonga mbika otayi gandja omalongo kaakwashigwana yetu ya kale ya pashukila eyopaleko, yo ya kale ye shi kutya elalakano lyokukaleka oshilongo nomahala gawo ga yela olya shike, ta ti okukala pehala lyaa na uuyogoki kashi shi owala oku ulika nkene oshilongo sha kaka ashike otashi gandja woo ethano ewinayi kaatalelipo noku kakeka ewangandjo ndyoka lya pumbwa okugamenwa.”
Ta gwedha po kutya elalakano lyuuministeli okukaleka oshilongo shi li muundjolowele, naantu mboka ye li mo ya kale momahala ge na uuyogoki notaga hokitha, shino ta ti otashi kaleke woo kokule omikithi ndhoka hadhi taandele mombepo nomewangandjo, otaya lalakanene okukwashilipaleka kutya omahala oga yela, niiyagaya ayihe momidhingoloko oya toolwa mo, go taga kala taga imonikila.

Shifeta esiku ndyoka okwa li a hwahwameke aakwashigwana ayehe ya li ya gongala nokwa gandja oopulastika ndhoka tadhi longithwa okutulwa iiyagaya, niilongitho ngaashi omanyala goku ya gamena pethimbo taya toola iiyagaya na yilwe, ta ti naya tothe mo esiku kuyo yene ndyoka ya hala okutoola mo iiyagaya momidhingoloko dhawo nokwa ti naye shi ninge mbala.Okwa kunkilile aakwashigwana ya yande okudhipaga iiyamakuti ngaashi oompango nooveta dha tulwa po, ta ti omidhingoloko nadhi kale dha gamenwa, ko ku kondjithwe ayihe mbyoka yi li ompinge nooveta dhoshilongo.

LEAVE A REPLY

Please enter your comment!
Please enter your name here