Waa na mutanda ku na ngombe, waa na mpagona ku na iilya

0
77

Maria Namupala

ONIIPA-“Waa na mutanda ku na ngombe, ngoye waa na mpagona ku na iilya”, Ndhika odha zi mokana ka mayola gondoolopa yOniipa Mannetjie Kambonde pethimbo ta tula miilonga ewiliko lyamayola omushona pamwe newiliko lye kuyele oshiwike shika ,sha ningilwa poombelewa yelelo lyondoolopa ndjoka.

Elelo olya li lya kutha ko oongaku nokugwanitha po ontokolwa yokatendo oka-23 komomumvo 1992, ndjoka ya thamuna kutya omalelo goondoolopa oge na uuthemba okuhogolola oomayola nookansela aashona taya kala taya longo muukumwe noomayola yoondoolopa nokukutha ombinga miinyangadhalwa ya yooloka.

Soni Nambinga, ngoka e li omulongwa mondondo onti-11 posikola ya Hans Daniel Namuhuja momudhingoloko gwOniipa oye a hogololwa a kale mayola gopevi omanga Simon Nambandi oye mayola omushona gopevi, taya kwathelwa kookansela ngaashi Josephine Alexandre, Saima Boy, Joseph Amutenya, Martin Thomas na Antonius Iyaloo.

“Shika otashi gandja ompito kuyo okukutha ombinga momathaneko nomomahumokomeho gondoolopa, osho wo okugandja omathaneko kelelo lyondoolopa ngoka taya pewa kaagundjuka aakwawo,notashi ya pe oompito oombwanawa okuninga omathaneko goonklamwenyo dhawo komeho, yo taya kutha ombinga miinyangadhalwa yomahumokomeho,” Kambonde ta gwedha po ngaaka.

Pethimbo ta ganithilwa miilonga , Mayola Nambinga okwa uvaneke ta ka gwanitha po iilonga ye nokukwashilipaleka kutya oya longa ngaashi shu uthwa okukwathela elelo lyondoolopa oku eta omahumokomeho mondoolopa ayihe.

Nambinga okwa ti otaya lalakanene okulongela kumwe naanaskola ooyakwawo oshowo aagundjuka, nokwa uvaneke taya kala taya unganeke iigongi nokutsakanena pomahala ga yooloka yo taya ikundu nkene ye na okuyambula po nokuhumithakomeho ondoolopa yawo.
Okwa ti oya hala ya totepo iikunino yiiyimati niikwamboga, naashoka okwa ti otashi ningwa uuna ye na elongelokumwe notaya nana mepaya limwe. Ta ti oya hala okushunitha pevi ondjala nonkalo yoluhepo momidhingoloko dhawo, nelalakano lyokuhanganitha aagundjuka, otaya kala taya longekidha omaudhano ga yooloka yo taya hangana nokunyanyukilwa pamwe.

“Ondi li ndi uvite etumba moku kala nda inekelelwa oshinakugwanithwa shika komapepe gandje opo ndi yakule oshigwana nokukandulapo woo oompumbwe dhasho, ondi inekela kutya ondjodhi yo 2030 otatu yi adha ngele tse aaNamibia otwi imanga kumwe tu na ombili, nena neliko lyoshilongo otali humu nawa komeho, otandi ka longa pamwe naagundjuka ooyakwetu,” mayola omushona ta ti.
Ta gwedha po kutya okwa hala aanyasha yomondoolopa ya kale ye na elongelokumwe naanyasha yokoondoolopa dhopuushiinda, noya kale aluhe haya tsakanene nokwi ikunda nkene ye na okukondjitha omashongo ngoka ge ya palamena.

Mayola ta ti okwa hala ya longele kumwe newiliko lyondoolopa yo ya longe muukumwe mokukondjitha omashongo ogendji ngoka ga taalela aagundjuka, yo taya kala iiholelwa iiwanawa moshilongo yi shi okulandulwa, yo taya yanda ookuume aawinayi mboka ihaaya endele shimwe.

LEAVE A REPLY

Please enter your comment!
Please enter your name here