Ya kenyanana ketoto lyiiyagaya mOmuthiya

0
88

Maria Namupala

OMUTHIYA-Yamwe yomaakalimo mondoolopa yomOmuthiya oya holola omaipulo nomakemo gawo, omolwa etoto lyiiyagaya ndyoka taya holola kutya olya nika unene oshiponga kaantu mboka haya kala mondoolopa.

Otali adhika popepi nondoolopa nolundji opo hapu umbilwa noku ekelwa iiyagaya. Etoto ndika otali adhika pooha nondoolopa momukunda Omadhiya mpoka pwa thanekwa gamwe gomomahumokomeho gondoolopa.

Aakwashigwana ndhika oye dhi holola oshiwike sha zi ko pethimbo elelo lyondoolopa lya li lyu unganeka omutumba naakwashigwana yi inike komilungu nkene ye na okuyambula po nokuhumitha komeho ondoolopa yawo. Etoto lyiiyagaya olyo lya li limwe lyoomoonkundwa dhawo esiku ndyoka.

“Otatu pandula sho elelo lyoondoolopa lya unganeke omutumba nguka, otwa kala twe gu hala tse tu gandje omakemo nomayele ngoka tu na, yakwetu otu na unene uupyakadhi netoto lyiiyagaya, otwa pumbwa elelo li katuke onkatu yo ya tale kutya otaye li ningi ngiini,” yamwe taya popi ngaaka.

Oya holola kutya uuna iiyagaya tayi fikwa olwithi ohalu gundumuka lu uka momagumbo gawo, shoka taya ti osha nika oshiponga, nolundji aantu mboka ye na omagumbo pomudhingoloko ngoka ohaya adhika komikolo molwaashoka olwithi ndoka olu na iinima oyindji nolwa nika oshiponga unene sho hamu fikilwa kehe shimwe.

“Ohatu iyadha owala pethimbo iiyagaya tayi fikwa omagumbo getu ge li kohi yolwithi, naashika otashi tu etele omikithi unene ndhoka hadhi taandele mombepo, otashi kala oshiwanawa uuna elelo lyondoolopa tali tala mpoka tali tululula ehala lyo li kalekwe kokule naakwashigwana,” taya gwedha po ngaaka.

Omunambelewa omukuluntu melelo lyondoolopa ndjoka Samuel Mbango pethimbo ta gandja omayamukulo momutumba ngoka okwa ti uupyakadhi nomukundu gwetoto oye gu nongela, nonkene elelo lyondoolopa olya totha mo omahala gaali mpoka pwa thanekelwa pu tulwe etoto lyiiyagaya epe, go omukundu nguka gu kale gwa kandulwa po.

“Omolwa omukundu nguka otwa li twa tokola opo tu kale hatu fike iiyagaya manga yi li mo iishona, molwaashoka uuna ya ningapo oyindji olwithi ohalu gundumuka, otu uvite olukeno naakwashigwana yetu notatu uvaneke kutya muule wethimbo efupi omukundu nguka otagu kala gwa kandulwa po,” Mbango ta gwedha po ngaaka.

Omunambelewa ta tsikile ko ta ti pomahala mpoka pwa thanekelwa etoto lyiiyagaya otapu adhika omagumbo, nooyene yomagumbo ngoka oya pumbwa okufutwa opo ya gandje ehala ndyoka, nomolwa eshongo nomukundu goshimaliwa otaya tala kutya otaya uvathana ngiini kombinga yofuto mbala, opo yi inyenge ya gandje ompito nokuyapukila omahumukomeho gondoolopa.

Mbango okwa kunkilile aakalimo mondoolopa ya longele kumwe nelelo lyondoolopa, yo ya kale aluhe haya gandja uupyakadhi, omakemo nomathaneko ngoka ya hala ga etwe mondoolopa yawo, ta ti otaya sindana owala uuna pu na elongelokumwe nelelo lyondoolopa osho wo aakalimo yamo.

LEAVE A REPLY

Please enter your comment!
Please enter your name here