A monitha mumwayina oshiponga sho e mu tindile omilalo

0
2378

Komutoolinkundana
Ongwediva

Ompangulilo yaMangestalata mOkahao oya gandja eifutilomo lyopakathimbo komunasikola e li mondondo 10 ngoka aniwa a ehameke noonkondo mumwayinagona konima sho a tindi okuya naye momilalo.

Otaku hokololwa Patrick Iyambo gwoomvula 27, omunasikola koNiita Iitula Combined School a li a patululilwa oshipotha shokudhenga nelalakano lyokuehameka omuntu sho a nukile nokudhengagula mumwayinagona gwoomvula 18, naye aniwa e li mondondo 10.
Mbaka ayehe oyomomukunda Epumba moshitopolwa shaKahao.

Oonzo ndhoka dha gandja uuyelele kuKundana otadhi hokolola Iyambo a kala nokuhola mumwayinagona ngoka gwomukiintu ethimbo nuule. Sho omukiintu a loloka anuwa okwa hokololele yinakulu kombinga yaashoka a kala ta ningilwa komupambele gwe gomulumentu.
Shika osha eta opo anuwa aakuluntu ya ithane Iyambo ye mu kumagidhe kombinga yomaihumbato ge.
Esiku lya landula, omanga ya li ye li mela lyondjila yu uka kosikola, Iyambo anuwa okwa ponokele omukiintu nguka noku mu dhengagula tashi nyanyaleke.

Otaku hokololwa kakadhona nguka a monithwa oshiponga nayi, a ehamekwa unene komutse.

Okwa falwa kokakilinika kaIndira Gandhi hoka a mono epango omanga inaa tuminwa koshipangelo kOkahao.
Omulumentu nguka okwa li a kwatwa po nokuholoka mOmpangulilo yaMangestalata mOkahao moka a li a pewa i ifutile mo noshimaliwa shi thike poN$500.00. Onkalo yanakumonithwa oshiponga otaku hokololwa tayi ende tayi nawapala.
Omupopiliko gwOpolisi moshitopolwa shaMusati Warrant Officer Lineekela Shikongo okwa koleka oshiningwanima shika.

LEAVE A REPLY

Please enter your comment!
Please enter your name here