Aakalimo ya pulwa ya yapukile omahumokomeho

0
30

Maria Namupala
OMUTHIYA

Mayola gondoolopa yOmuthiya Katrina Uusiku okwa kunkilile aakalimo yomondoolopa ndjoka ya yapukile omahumokomeho, nokulandula omilandu nooveta dhelelo lyondoolopa, yo yi iyageke okulonga iilonga yi li ompinge nelelo lyondoolopa.

Uusiku otwa li twa yi moonkundathana naye oshiwike sha zi ko, mono a totha mo kutya okwa konekwa oyendji yomaakalimo taya ndopa okwiiyutha koompango dhelelo lyondoolopa, noyendji otaya tindi okuyapukila omahumokomeho.

“Nonande elelo lyondoolopa yetu tali ningi iigongi mpaka naampeyaka, okukunkilila aakwashigwana ya yapukile omahumokomeho, unene ooyene yomagumbo mboka yi iyadha pomahala mpoka pwa thanekelwa omahumokomeho nomayambulepo gondoolopa, oyendji oya tindi na inaya hala okutululwa,” Uusiku tati.

Okwa ti oshinima shoka osha yemateke elelo lyondoolopa, sho unene natango yamwe mboka ye na omitse dha teka taya tsikile okutunga omagumbo gawo pomahala mpoka inaaya pitikilwa, nonande taya lombwelwa kaaye shi ninge oya tindi omalombwelo gelelo lyondoolopa.
Uusiku ta ti elelo lyondoolopa oyo tuu ndjoka oli na omathaneko omanene unene meyambulepo lyondoolopa, yo yi kale yimwe yomoondoolopa tadhi imonikila moshilongo ashihe, noyi na ontalelo ombwaanawa tayi nana aatalelipo notayi kwathele mokuyambula po eliko lyoshilongo.

Ta gwedha po kutya mushimwe shomiigongi mbyoka ya ningi pehulilo lyomumvo gwa piti, oya li ya thaneke opo ya kale taya tsakanene naakalimo yomondoolopa, noku ya tseyithila omahumokomeho ngoka taga inyenge, opo ngele ope na yamwe ye na omagumbo ge li mpoka pwa thanekelwa sha sha nika ehumokomeho oya pumbwa okwiinyengithwa yo taya falwa kehala lyilwe.

“Ngaashi shi li pakotampango nopaveta yoshilongo kutya elelo lyondoolopa kehe oli na uuthemba okutululula omagumbo ngoka ge li pomahala mpoka pwa thanekelwa omahumokomeho, nomondoolopa yetu opo shi li, nooyene yomagumbo ohaya pewa okashona omolwa etembudho ndyoka, olundji oya tindi okuyapukila omahumokomeho, nonande ge li muuwanawa waantu ayehe,” ta popi ngaaka.

Okwa tsikile ko ta ti elelo lyondoolopa otali ka kutha ko oongaku nokukatukila mboka itaaya iyutha koompango ndhoka dha tulwa po, unene mboka taya tsikile okutunga pomahala gi indikwa nonande taya lombwelwa aluhe otaye shi ningile owina.
Uusiku ta pula aakalimo yomondoolopa mboka ye na uupyakadhi ya talele po ombelewa ye ta ti omiyelo odhe ya egulukila ethimbo kehe, yo ya gandje omakemo gawo nota ti unene mboka ye na uupyakadhi womatulululo.

Mayola ta totha mo gamwe gomomahumokomeho ngaashi okapale ketanga hoka ta ti oke li pamuthika gopashigwana, okwa pula aakalimo yamo ye ka kaleke po opo ka vule okulongithwa komapipi tage ya, ta totha mo kutya omahumokomeho otaga imonikila noge li muuwanawa waaNamibia ayehe.

Ta kunkilile ayehe kaaya tunge omanga inaaya pewa epitikilo okuza kelelo lyondoolopa, yo naya iyageke okuya omathaneko gelelo lyondoolopa moshipala, ta ti ayehe mboka ye li moongamba dhondoolopa otaya vulu owala okutsikila okutunga uuna ya pitikwa kewiliko lyopombanda.

LEAVE A REPLY

Please enter your comment!
Please enter your name here