Amukwa omukiintu omuNamibia ta wayuka mefuta noosikepa

0
980

Komutoolinkundana
OVENDUKA

She ku pe pamba shambekela nomaako agehe, shika osho olweendondjila lwa Tuwilika Amukwa, ngoka e li ha longele mefuta. Ondjila ye yokukala ha longele momeya oya tameke sho a li i inyolitha moshiputudhilo shoka hashi nongeke kombinga yoohi noonzo dhilwe dhomefuta, tashi ithanwa Namibia Maritime and Fisheries Institute (Namfi), tashi adhike mOmbaye. Oshiputudhilo shino osho she mu pe oshipatululo a kale gumwe gomaakiintu aaNamibia omuluudhe ta longo onga omuwiliki gwoondjila dhomefuta. Onzapo ye otayi mu pe oonkondo dhokuwilika oosikepa ndhoka dha shiga ko, dhi na oondongelwa ofulundundu osho wo aantu oyendji.

Ashike uuwanawa ihau zi pokapala ka yela, konima sho a mana eilongo lye moNamfi, okwa ka konga iilonga opo a mone ontseyo, nokonima okwi ishangitha ishewe koUniversiti yaCape Town koSouth Africa hoka a ki ilongela onzapo onene. Nonando eilongo lye okwe li piti nuupu ngokambi mehuli, opwa li pe na uudhigu oshoka ka li e na iimaliwa yoku ishangitha moku idheula ye a wape a wilike oosikepa ndhoka oonene. Kapwa li wo pe na ngoka te mu kwatha, onkene Amukwa okwa kala omvula ayihe pevi, e li megumbo kee na iilonga niiyemo.

Namfi oshiputudhilo moka aanamibia mboka ya hala oku ilongela iilonga yi na sha nefuta noonzo dhamo haya ilongo. Muka aantu ohaya longwa nkene ye na okuwilika oosikepa, osho wo okutakamitha oondongelwa. Aapangeli yoosikepa nayo wo ohaya zulwa moshiputudhilo shika, moka haya longwa nkene ye na okukaleka po oosikepa osho wo iikwa niipangitho dhawo.
Amukwa omvalele yEtale moshitopolwa shaHangwena. Okwa sikola pEtale mpoka e ta ka tsikila kosekundosikola yaGabriel Taapopi moka a manena ondondo onti-12 momumvo 1997. Sho a mana oku ilongela onkatu ye ontihamano mo 2002, okwa tsikile nonkatu onti-5 mo 2004. Nopethimbo a li ta longo moosikepa dhaNovaNam naPescanova koLiindili mo 2003, okwa kala nokudhiginina eilongo lye.

Konima sho a mono onzapo ye koNamfi mo 2004, Amukwa okwa li a yelwayelwa miilonga, moka a li a pewa onkatu ontiyali, onkatu ndjika ohayi ya niinakugwanithwa oyindji, moka mwa kwatelwa okutonatela olweendo lwosikepa. Okwa li wo a yelwa e ta pewa onkatu ndjoka yi na oshinakugwanithwa shokutonatela oondongelwa ndhoka dhi li moskepa, osho wo okukala omukuluntu gwaaniilonga yomoshitopolwa shimwe mosikepa. Mpoka okwa kala po sigo omumvo 2011, mo 2012 okwa li i ki ilongela ishewe onzapo yi na sha niikwafuta koUnivesiti yaCape Peninsula, hoka a kala ko sigo omumvo gwo 2013.

Uulongelwe mbuka koshiputudhilo sha tumbulwa pombanda otau pula opo omuntu a kale i idheula nokulonga moosikepa konima yokuzala eguwo, tapu ningwa ekonaakono lyopakana, yo opo ihe taya pewa oshishani ya ka longe moosikepa. Ohashi pula nduno mondjato, ye Amukwa ka li nduno e na oshimaliwa. Sho osho she mu kalitha pevi uule womvula ayihe konima sho a mana eilongo lye nonzapo ye ndjoka a monene muApilili 2014. Ashike elago lye olye ke ya sho a li a ithanwa kuNamsov a ka ningilwe omapulokonaakono. Okwa li e shi pondola nehangano ndika olyo lye mu futile opo a mane omaidheulo ge.
“Omailongekidho ngaka kaga li nande omapu, ou na okukala wu shi shoka to ningi, ngoye to lu wo wa tula ombunda moshihwa,” Amukwa ta ti ngaaka.

Pethimbo lyoku idheula okwa li a tulwa mosikepa yedhina SA Agulhas, nolwanima okwa tulwa muyimwe yedhina Oliphant moka i ki iyadha ta yi kiilongo yaEuropa, Mauritius osho wo koGuinea.

“Ashike kasha li oshipu, oshoka onda li wo tandi tonatele aamwameme. Ashike shika onde shi ningi nomutima gwa yela oshoka ezimo oshinima sha simana kungame, sho ishwe oshinakugwanithwa shandje. Paife onda hombolwa nondi na wo omumwandjekadhona.”
Opo a vule okutalela osikepa, oku na okukala oowili 8 pehala ndyoka hali ithanwa ontopa, ano li li mpoka hapu kala omuhingi gosikepa. Oowili ndhoka hetatu ohadhi topolwa miipambu iyali, oowili ine omutenya, noonkwawo ine uusiku.
“Ashihe shika onde shi pondola miilonga mbyoka hayi longwa unene kaalumentu, naantu ohaya kala ya tegelela waahe shi pondole, onda li nda longo nuudhiginini nonda sindana.”

Amukwa ta popi wo nkene eyambidhidho lyomusamane gwe lya li lye mu kwatha molweendo lwe nduka. “Omusamane gwandje okwa kala nokuyambidhidha ndje molweendo nduka sigo nda adha ondjodhi yandje. Haalumentu oyendji taye shi ningi.” Ta ti ngaaka.
“Ondi na ongunga yolupandu komusamane gwandje, osho wo kaakwanezimo yandje mboka haya kwatha ndje uuna itandi vulu okulonga iilonga yontumba omolwa iilonga yandje, ku kehe ngoka wa hala okusindana moshinima oshidhigu, otandi ku kumagidha wu ninge etokolo e to panga uukuume nalyo sigo to adha elalakano lyoye.” Osho a li a kumike ngaaka.

LEAVE A REPLY

Please enter your comment!
Please enter your name here