Grace naRobert Mugabe otaya ti yo aatokele to!

0
440

Ngoka a li nale omuplesidente gwaZimbabwe, Robert Mugabe pamwe nomukulukadhi gwe Grace Mugabe, otaya ti yo aathigona yanakupwe, taya ti oya toka thilu oshoka oye na ashike omagumbo gaali moSouth Africa, osho wo egumbo limwe moHong Kong. Okwa li a gwanitha po elombwelo opo a kale a eta puuyelele omaliko ge ngoka ge li pondje yoshilongo.
Emerson Mnangagwa, ngoka oye e li omuplesidente gwaZimbabwe okwa ti ota ka dhimina po mboka taya ka galulila moshilongo iimaliwa ayihe mbyoka ya li ya kuthwa mo okupitila momukalo guulingilingi.

Edhiminopo ndika olya hulu mo19 Maalitsa naMugabe nanekulu lye Grace oya lombwele aatoolinkundana kutya oya li ya ningi shoka ya lombwelwa.

Taya ti oya li ya lopota kutya oye na omagumbo gaali moSouth Africa, osho wo egumbo limwe lyi li koHong Kong ndyoka tali kondjelwa kuyalwe wo, yo taya ti kaye na nando oyo iimaliwa yi li moombaanga dhopondje yoshilongo.
“MoSouth Africa onda li nda landa mo egumbo lya kulupa, onda li nda hala oku li teyagula po opo ndi wape ndi lyi longithe nawa,” Grace ta ti.

“Tse aantu tu hole oshili, katu na nando omambambi gontumba pondje yoshilongo. Katu na egumbo koDubai. Otwa li hatu hiila egumbo sho okamwanamati ketu ka li taka ilongo koshilongo hoka, ashike okwa li a tokola a ka manithe eilongo lye koSouth Africa.”
Kuyele oshiwike shika, Mnangagwa ngoka a li a kutha koRobert Mugabe koshipundi, okwa ti ota ka popya kondandalunde mboka inaaya landula eindilo lyepangelo ya galule omaliko agehe ngoka ge li pondje yoshilongo. Ta ti omahangano omanene ogo ge li shikwete po moshinima shika.

Uuyelele tau zi moZimbabwe okupitila moshikundaneki shoSunday Times otau ti kutya limwe lyomomaliko gaMugabe egumbo lyi li moJohannesburg, li na ongushu yooranda dhaSouth Africa oomiliona 44.
Tau ti wo Mugabe okwa koleka kutya okwa li ha futu oshimaliwa shi thike poomiliona 6,5 omvula kehe onga ohiila yegumbo moka mwa kala hamu zi omona moDubai

Aantu taya pula wo kutya osha enda ngiini opo a kale e na omahauto gondilo, osho wo iikutu nomitshuhu dhi hadhi zalwa ashike koohashikeshalye.

Mugabe ta ikale ke wo kokule nomipopyo tadhi ti oku na oofaalama ondumba dhoka dha li dha kuthwa aanafaalama aatiligane. “Ondi na ashike ofaalama yimwe, ndjoka nda landa niimaliwa yandje ngame mwene.” Ta popi ngaaka.
– Sunday Times

LEAVE A REPLY

Please enter your comment!
Please enter your name here